Isumat.com/7:36AM, July 29, 2020
Tikang han pagtugot nga makabalik utro an mga Locally Stranded Individuals ha aton dapit, nagtikahabubo an ihap han nakakatalwas tikang han infection han COVID-19 ha Eastern Visayas. Ini in dara gihapon han tigda nga paghitaas han mga nadadarahigan han virus.
Sobra na usa ka semana an nakalabay, sumirit ha 95 porsyento an recovery rate han rehiyon, pero han tugutan utro an pagpasulod han mga LSI, hinayhinay nga nag-alos-os an ihap han nagpapaka recover ngan yana aada nala ini ha 77 porysento.
Dida han record han DOH Regional Office, 653 an naka-recover tikang han 848 nga natapnan han makamaratay nga kagaw ha Sinirangan Bisayas. Mayda tulo nga pasyente an naka-recover kakulop (Hulyo 28). An active cases hapagkayana in 192 ngan nagpapabilin nga tulo an binawi-an han kinabuhi.
Dida hini nga mga nagkatatapnan, 582 an mga LSI, 59 an OFWs, 3 an benefeciario han Balik-Probinsya ug an iba in durot han Local/Community Transmission.
Kakulop, 27 an nahidugang nga pasyente han COVID ug ngatanan hira in mga LSI. An bungto han Paranas, Samar amo an nag-antos kakulop han gidadamu-i nga bag-o nga pasyente kay 14 an natapnan nga residente.
Lima naman an nagpositibo ha Motiong, samtang duha naman an bag-o nga pasyente ha Basey, usa ha Catbalogan ngan usa gihapon ha Sebastian.
An Maasin City in duha an nahidugang, samtang tag-usa naman an tikang ha Sogod ngan Malitbog, Southern Leyte.
Nangunguna an Leyte ha ihap han mga nagpositibo (366), ug nasunod an Samar (180). An Southern Leyte in mayda 108, tag 64 an Ormoc ngan Tacloban, 34 ha Biliran, 29 ha Northern Samar ngan 3 ha Eastern Samar.
An mga health workers nga nagkatatapnan in umabot na ha 109. #
