Isumat.com/8:11AM, July 30, 2020
15 nga mga residente han Sinirangan Bisayas an bag-o nga nagkatatapnan han COVID-19 sumala han iginpagawas nga report han DOH Regional Office kakulop, Hulyo 29, 2020.
Upod han mga nagpositibo han kagaw in usa nga health worker ngan mayda liwat kaapi han Bureau of Fire Protection. Taga Merida, Leyte an 49-anyos nga babaye nga health worker pero waray pa maghatag an LGU hin kadugangan nga detalye. An Fire Officer in taga Matalom, Leyte. An LGU in nagsering nga 38 anyos an pasyente. Mayda liwat usa pa nga pasyente an Matalom ug hiya in LSI nga babaye tikang ha Cebu.
An Ormoc in may nagpositibo pinaagi hin 26-anyos nga lalaki tikang ha Cebu; usa naman nga OFW tikang ha Miami, Florida an natapnan ha Albuera; 43-anyos tikang ha Manila an bag-o nga pasyente ha Barugo; tikang naman ha Pasig City an 28-anyos nga pasyente ha Tolosa; 26-anyos nga babaye an bag-o nga kaso ha Mayorga; ngan OFW nga lalaki an nagpositibo ha Palompon.
Ha probinsya han Biliran, tag-usa nga kaso an nahipatik ha Kawayan ngan Caibiran ngan hira in tikang ha Rizal ngan Pasay City.
Mga LSI gihapon an tulo nga bag-o nga kaso ha Calbayog City. Hira in mga kababayen-an, kun diin an duha in tikang ha Marikina ug an usa tikang ha Pasay. 27 na katawo an nagpositibo han virus ha Calbayog ngan 15 an naka-recover.
An bungto han Sta Margarita in may bag-o nga natapnan ug hiya in 48-anyos nga babaye nga LSI.
Ha bug-os nga Eastern Visayas, 863 na an nagpositibo ngan 658 (76%) an naka-recover, upod na denhi an lima nga naka-recover kakulop. Mayda 202 nga Active Cases hapagkayana ngan nagpapabilin ha tulo ka tawo an namatay. An mga health workers nga natapnan in umabot na hin 110. #
