Isumat.com/5:05AM, July 26, 2020
46 nga positibo han COVID-19 an nahidugang ha Eastern Visayas han nakalabay nga adlaw (Hulyo 25) sumala han gibabag-uhi nga report han DOH Regional Office. Igin-anunsyo gihapon han ahensya an bag-o nga lima nga recoveries.
An bungto han Capoocan, Leyte an ginbunalan hin walo nga bag-o nga pasyente han ginkakahadlukan nga virus. An walo nga pasyente in ginkokomponer hin pito nga mga Locally Stranded Individuals tikang ha Luzon ngan Metro Manila, samtang an usa in OFW tikang ha Saudi Arabia.
Lima naman nga Positive Cases an nahipatik ha Abuyog. Ngatanan ha ira in mga LSI tikang ha Cavite, Makati ngan Quezon City. Lima gihapon an bag-o nga natapnan ha Villaba ug tanan hira mga LSI tikang ha Cebu. An upat in waray iginpapakita nga sintomas, samtang an usa nga babaye in gin-iinubo hapagkayana.
Taga-tulo naman nga mga pasyente an nahidugang ha Palo, Tanauan ngan Hindang, Leyte. Ngatanan taga Brgy Guindapunan an mga taga Palo. An duha ha ira in tikang ha Quezon City, samtang an usa in 24-anyos nga OFW. An mga Taga-Tanauan in tanan LSI nga tikang ha Manila; samtang tikang naman ha Cebu, Manila, ngan Quezon City an nahidugang ha Hindang.
An Tacloban City in mayda duha nga bag-o nga natapnan. Hira in 35-anyos ngan 48-anyos nga kababayen-an. Waray pa maghatag hin impormasyon an City Government kun LSI, OFW o Local Transmission ini nga mga kaso.
Mayda gihapon usa nga natapnan ha Carigara ngan hiya in 17-anyos nga babaye. An LGU in nagpahayag nga deri hiya LSI ngan deri liwat OFW. Nagsaad an LGU nga maghahatag hira hin detalye kun matapos na an ira gindudumara nga contact tracing. Naka-admit ha hospital ini nga pasyente.
Tikang naman ha Cainta, Rizal an bag-o nga pasyente ha Calubian ngan hiya in 25 anyos nga babaye; tikang ha Cavite an 29-anyos nga lalaki an bag-o nga kaso ha Hilongos; 57-anyos nga lalaki tikang ha Pangasinan an nagpositibo ha Isabel; babaye nga 20-anyos tikang ha Makati an bag-o nga natapnan ha Matag-ob; tikang ha Mandaue an bag-o nga pasyente ha Ormoc City; samtang an LGU-Dulag in waray pa maghatag hin impormasyon kasumpay han ira bag-o nga pasyente.
Ha Probinsya han Samar, tag-usa nga kaso an nahidugang ha Jiabong ngan Paranas ngan hira in mga LSI tikang ha Luzon.
An lalawigan han Biliran in nagka-ada hin walo nga bag-o nga kaso. Duha nga kalalakin-an an nagpositibo ha Naval; upat nga LSI tikang ha Malabon, Cavite, Quezon City ngan Valenzuela an mga kaso ha Caibiran; samtang mga LSI an bag-o nga mga natapnan ha Kawayan ngan Almeria. Ha kabug-usan 34 na katawo an nagpositibo han kagaw dida han probinsya.
Hapagkayana, umabot na 806 an nagpositibo han virus ha Sinirangan Bisayas ngan 649 an naka-recover (80%). 154 naman an mga Active Cases. #
