Duha na ka tawo an positibo han COVID-19 ha Eastern Visayas. Ini an ginkumpirmar han DOH-Region 8 ha usa nga press conference alas 10 han aga, Marso 31, 2020.
An ikaduha nga positibo han virus in taga Calbayog City nga pumakadto ha Manila ngan pagbalik niya ha ira lugar, naka-abat na hiya hin sintomas, pahayag pa han DOH. Gin-admit hiya ha usa nga hospital didto han syudad ngan nagpadara hin sample an DOH ha Manila para han testing kun diin positibo an nagin resulta. Ini nga pasyente in usa nga lalaki, 63 anyos, may pamilya, diabetic ngan mayda hypertension.
Nagdudumara na yana hin contact tracing an health personnel basi mapanginano an mga tawo nga iginka-urusa han pasyente.
Samtang ginsusurat ini nga notisya, nagpadara na hin team an DOH ngadto ha Calbayog basi kuha-on an pasyente ngan igbabalhin ha EVRMC.
Iginkalipay naman pagsumat han DOH nga maupay na yana an kahimtang han 51-anyos nga babaye nga syahan nga positibo ha aton rehiyon. Duha na ka beses nga nag negatibo an resulta han bag-o nga testing ha iya ngan nakatalaan na hiya pagawson ha hospital. Ini nga pasyente in tikang ha Catarman, N. Samar.
Igindugang pa han DOH nga an syahan nga batch han mga samples han mga tawo nga iginka-urusa hini nga babaye in nag negatibo gihapon ha laboratory tests. #
(Posted 10:29 AM, March 31, 2020)
