Isumat.com/8:30AM, July 15, 2020
Ayaw pagpaturapak nga masulod ka la hin bisan ano nga establisemento ha Tacloban, kay bangin deri ka pasudlon bisan pa daw kumpleto ka hin papeles.
Ini in tungod kay tinikangan hiton Hulyo 16, Huwebes, igpapatuman na han City Government an paggamit han QR (Quick Response) Code Pass antis makasulod ha mga tindahan o kompaniya ngan opisina. Ini in gagamiton labi na ha mga dagko nga tindahan, farmacia ngan iba pa.
Ginsasagdunanan an katawhan labi na an manmaralit o may mga transaksyon ha mga establisemento. Labot la han mga Taclobanon, gin-aaghat gihapon an mga mulopyo ha gawas han syudad nga magpa-rehistro hini nga QR Code basi magin matulanoy an ira mga transaksyon kun mapakadi hira ha Tacloban.
Puede ini makuha pinaagi ha internet ha www.safecity.tacloban.gov.ph ngan kun waray smartphone, puede ini makuha ha tagsatagsa nga barangay. Ini nga QR Code in dako an gamit labi na ha contact tracing ngan mabibisto dayon kun mayda positibo han virus nga mapakadto han mga tindahan.
Pira na ka adlaw nga an mga personales han City Government in nagtata-od ha mga establisemento han mga gadget nga gagamiton hini nga proseso. Magigin malaksi gihapon an pagpasulod han mga kliyente kay deri na magsisinurat han logbook, lugod an QR Code an gagamiton.
Iginpatapod naman han mga tag-iya han negosyo an ira kooperasyon hini nga pitad han syudad, pero naghangyo hira ha City Government nga unta magin hapsay an implemetasyon hini kay bangin deri maupay an epekto hini ha negosyo. Mayda kabaraka an mga negosyante nga maiibanan an mga kostumer kun deri tanan magka-ada hini nga QR Code Pass.
Ginhihingita han mga negosyante nga katagan pa hin kadugangan nga panahon antis an hul-os nga implementasyon hini basi makasabot an ngatanan nga katawhan ngan maka-andam an mga establisemento.
Huyo nga bahin, temporaryo nga ginpasadhan an Cafe Lucia ha Real St, Tacloban. Napamatud-an nga nagtalapas han health protocols an nasabi nga restobar sugad han physical distancing ngan 50 porsyento la han kapasidad an puede sumulod. Waray gihapon sanitary permit an mao nga establisemento sumala pa han report.
Kasumpay hini, nagpahinumdom an City Government ha iba pa nga establisemento nga hingpit pagsundon an mga patakaran ha panlawas basi waray magin problema han ira operasyon. #
