Isumat.com/4:00PM,June 22, 2020
Nagpabati hin kabido hi Biliran Governor Rogelio Espina dara han alegasyon nga bumaribad an DiVine Word Hospital nga igpadayon an operasyon han pasyente nga doktor nga nagpositibo han COVID-19.
Dida han iya pahayag, nagsumat pa hi Espina nga sugadsugad nga mayda deri tama nga proseso an hospital kay dida han ikaduha o reswab test, negatibo na an nagin resulta. Sanglit, nagawas nga nagkaka-impati an mga resulta han laboratory test dida han nasabi nga hospital. Ngan pagpa testing ha iba nga hospital, negatibo na liwat an resulta.
An nadadabi nga pasyente amo an doktor nga taga Naval, Biliran. Hiya in nagpa-admit ha DWH kay magpapa-opera unta hiya dara han sakit nga Spinal Cord Nerve Root Compression. Pero waray igpadayon an operasyon han mag positibo hiya han COVID-19 ug an bugto han pasyente in nag-asoy nga ginpalakat na hira dida han hospital. Pero nagka-ada pa hin utro nga swab test, ngan negatibo na an resulta.
Nagdesisyon an pamilya han pasyente nga dad-on ha Cebu an doktor ngan didto ha Perpetual Succor Hospital ira ginpa-admit para han operasyon ug negatibo na liwat an resulta han iya swab test didto hini nga hospital ha Cebu.
Hi Gov Espina in nananawagan kan DOH Secretary Francisco Duque nga panginaoon ini nga insidenta kay deri ini makatawo labi na yana nga aada kita hin krisis ha panlawas. Sering pa man han gobernador, makabibido ini kay mismo usa nga frontliner an ginbaribaran hin serbisyo, asay pa ba kun ordinaryo la nga mulopyo an pumakadto hini nga hospital, paki-ana han gobernador.
Para kan Espina, klaro ini nga deskriminasyon ha usa nga tawo nga nagpositibo han virus. Nag-aaro gihapon hi Espina hin kasayuran tikang dida han nasabi nga hospital ha Tacloban kun kay-ano nga magka-iba an resulta han testing ngan katungod han pasyente nga makasabot kun kay-ano labi na kay nagbayad hiya para han proseso.#
