Isumat.com/8:32AM, July 28, 2020
Maabot hin 1,145 nga magkalainlain nga kalibre hin armas de fuego an gin turn-over han PNP Regional Office ngadto ha Regional Civil Security Unit (RCSU) kakulop (Hulyo 27). An nasabi nga mga pusil in nakumpiskar, iginsurender, narekupo, ginbayaan o naremata ha magkalainlain nga kaso ngan insidente.
Sumala han PNP Regional Information Office, ini nga mga pusil in tikang ha bug-os nga rehiyon kun diin 427 an tikang ha Leyte; 159 tikang ha Biliran; 149 ha Southern Leyte; 142 ha Ormoc City; 100 ha Northern Samar; 77 ha Eastern Samar; 51 ha Samar; ngan 40 tikang ha Tacloban City.
Waray lisensya an haros 800 hini nga mga pusil, samtang an iba in mga ebidensya tikang hin mga kaso ha korte. Sobra 500 an mga pistola, 112 an shotgun ug an iba in riple ngan revolvers.
An RCSU amo an natu-inan nga maghipos han layaw nga mga armas ngan igpapailarum hin ballistic examination. Ini nga eksaminasyon in ginhihimo basi maprobaran kun gingamit ba an pusil hin usa nga panhitabo o krimen.
Kasumpay hini, an PNP Regional Office in nag-aawhag ha mga tag-iya hin pusil nga waray lisensya o nag-expire na an lisensya nga igpa-rehistro ini basi deri hira magproblema ingkaso may mga remalaso unina ha urhi. Ini nga pitad in agud kapugngan an kriminalidad ngan kasamok. #
