Isumat.com/8:32AM, September 9, 2020
Para han mga parayawnon nga iginpupublikar ha social media an ngatanan nga aktibidadis upod na an katitirok ngan pag-irignom, paghirot kamo !
An PNP Regional Office in nag-warning nga deri hira magruruhaduha pagdakop han mapapamatud-an nga nakasupak han mga patakaran ha panahon han pandemya ngan an ira pag-monitor hini nga mga aktibidadis in pinaagi han social media sugad han facebook.
Nagsering hi PNP Region-8 Spokesperson Lt Col. Bella Rentuaya nga ira na ginmomonitor an mga post ha social media kun diin iginpaparayaw an mga aktibidadis bisan kun supak han Health Protocols. Upod na denhi an paghimo hin mga katitirok, pag-irignom ngan iba pa nga buruhaton.
Kasumpay hini, nanawagan naman hi Rentuaya ha publiko nga kun mayda nira makikit-an nga sugad hini nga mga aktibidadis, deri hira mag-alang pagsumat ha kapulisan basi ma-aksyunan ini dayon. Gintagan hin duon han opisyal nga an PNP ug an publiko in kinahanglan magkaka-urusa pagbantay hini nga mga bayolasyon.
Hadin nag-agi nga semana, iginpahayag han PNP Central Office ha Campo Crame nga igmomonitor nira an posible nga Quarantine Violations nga iginpo-post ha social media, pero iginpatapod han PNP nga deri hira manginginlabot han pribado nga mga katungod han katawhan.
Iginpahayag gihapon ni Rentuaya nga 39 na nga kaapi han PNP Regional Office an nagpositibo han Covid-19 pero ngatanan hini in mag-upay an panlawas ngan waray iginpapakita nga sintomas han sakit. Dida han mga nagkatatapnan, upat na an nagpaka-recover.#
