Isumat.com/12:40AM,July 29, 2020
Waray tinuyaw nga natabo dida han pagbukalas hin salapti tikang han COVID Financial Package ngadto ha Catarman Doctors Hospital ha Northern Samar. Ini an igindig-on ni Ricardo Morales, Presidente ngan Chief Executive Officer han Philhealth.
Ini an nagin reaksyon ni Morales kasumpay han artikulo hin usa nga peryodiko kun diin nagsusumat an mga resident auditors han Philhealth nga deri angay maka-agom han pondo an hospital tungod kay waray ini akreditasyon ha Philhealth ngan may gin-aatubang nga kaso administratibo kasumpay han alegasyon nga nakasupak han mga patakaran han ahensya.
Nagpahayag pa an mga auditors nga hi Senior Vice-President Renato Limsiaco in sugad sugad nga ginpapaboran an nasabi nga hospital.
Hi Morales in nagsaysay nga waray iregularidad an cash advances para han mga pribado nga hospital kay kumpleto ini han mga rekisitos. Iya pa ginklaro nga ginbuhat ini nga cash advances basi maseguro nga deri mapipi-angan an paghatag hin serbisyo han mga hospital ngadto han mga apektado han COVID-19.
An Catarman Doctors Hospital in natagan hin 9.6 Milyones pesos ha ilarum han Interim Reimbursement Mechanism (IRM) ha dida han 30 Bilyones Pesos nga COVID Fund han ahensya.
Nagsering hi Morales nga an hospital in may lisensya nga mag-operate tikang ha Department of Health, sanglit waray anomaliya kun naka-agom ini han cash advance. Aminado hi Morales nga may kaso administratibo an hospital pero iya iginpasarig nga magbabaton an hospital ha balaud kun mapamatud-an nga salaan han kaso.
Ginhimo han Philhealth an mga cash advances basi andam hin pondo an mga hospital kay dako an posibilidad nga magsarang an virus ha bug-os nga Pilipinas.
Gindepensahan gihapon ni Morales hi Senior VP Limsiaco nga gintutudlok han mga auditors nga posible nagpapaluyo han pagpagawas han pondo ngadto han hospital. Hi Limsiaco amo an namumuno han Fund Management Sector han Philhealth.
Hi Limsiaco in waray kalabutan hini kay an iya obligasyon an pagseguro la nga kumpleto an mga dokumento ngan rekisitos han mga hospital nga karuyag makatagamtam han pondo. Hiya in deri nanginginlabot han pagpili han mga hospital nga magkaka-ada han nasabi nga cash advance, pahayag pa ni Morales.
Pinanhimuwa gihapon han Philhealth President an mga notisya nga waray liquidation ini nga cash advance. Nagsering hiya nga igpapailarum gihapon han istrikto nga proseso han “reconciliation and liquidation” an mao nga pondo. #
