Isumat.com/8:02AM, October 16, 2020
Waray makakaglabot ngan deri mare-recycle an iligal nga droga nga narekupo ngan ginkakaptan yana han Philippine Drug Enforcment Agency (PDEA) Regional Office.
Nagpasarig hi Rogelette Urgel, tagpamulong han PDEA-Eastern Visayas, ira gud ginseseguro nga waray hin-o man nga makakasulod ha lugar nga ira ginhihipusan han nakumpiskar nga mga droga. Sumala ha iya, kun waray otorisasyon tikang han namumuno han ahensya, deri makakasulod ngadto an bisan hin-o.
Nagsering pa hi Urgel nga dagko an mga kandado han kwarto ngan 24-oras an CCTV dida han laboratoryo nga ginhihipusan sanglit imposible mayda makakalusot.
Kun manunumduman, hi Presidente Rodrigo Duterte in nagmando nga pagsunugon na an ngatanan nga nakusmpiskar nga illegal drugs han PNP ngan PDEA basi kalikyan nga ma-recycle ngan mahibaligya pa ini han binugok nga mga otoridad.
Kadam-an na an mga alegasyon nga mayda pira nga tinubyanan han balaud an nakawat o ginliliwanan hin peke nga droga an mga narekupo basi igbaligya na liwat ini ha mga sindikato.
Igindugang pa ni Urgel nga sobra hin 600 Milyones Pesos kantidad hin droga an ira nahipadara ha PDEA-Cebu basi pagsunugon. Ginklaro niya nga deri ini masusunog denhi ha Region 8 kay waray ekipahes nga iginhatag nganhi para hini nga panuyu-anan. An makina nga ginagamit pagsunod han droga in aadto ha Cebu sanglit iginpapadara pa ini ngadto. #
