Isumat.com/Nobyembre 24, 2021
An mga kumunista nga rebelde an gintutudlok nga responsable hin pag-torture ngan pagpatay hin parag-uma ha Northern Samar hadin nag-agi nga semana.
Dida han imbestigasyon, ginkilala an biktima nga hi Romnick Rosas, residente han Brgy Pasabuena, Victoria Northern Samar. An iya patay nga lawas in natad-an han mga mulopyo hadton Nobyembre 16, 2021.
Am mga imbestigador in nakakita hin surat harani han lawas ni Rosas kun diin nakapatik nga an responsable han pagpatay amo an Rudante Urtal Command han New Peoples Army. Waray mahisumat kun ano an rason nga pinatay man an biktima.
Hi Rosas in nag-antos hin igo hin bala ha iya ulo, samtang nakamarka ha liog nga gintilo hiya ngan mayda mga binun-an ha magkalainlain nga parte han iya lawas.
Samtang, usa naman nga parahimo hin bomba han mga rebelde nga terorista an nagsurender didto ha Eastern Samar hadin Nobyembre 22, 2021.
Hi alias Elias, 55 anyos, inasaw-an ngan taga Gen MacArthur, Eastern Samar in nagsurender ha PNP Mobile Force Company ha Brgy Buenavista, Quinapondan, Eastern Samar.
Iya igintubyan in usa nga kalibre 38 nga pistola ngan mga bala, upod na gihapon in duha nga Improvised Explosive Landmines.
Nagsumat hi Elias nga paraghimo hiya hin bomba para han mga rebelde ug aada hiya han pwersa ni Ka Mael nga na-operate tikang ha Lawaan ngadto ha Borongan City.
An anay rebelde in aada ha kustudiya han kapulisan samtang ginpoproseso an mga dokumento para han pagbalik han mahimyang nga panginabuhi. #
