Isumat.com/2:49PM, June 13, 2020
Naghangyo na an Provincial Government han Leyte ngadto han Inter-Agency Task Force ha Cebu nga temporaryo suspenderon an pagpabalik han mga Leyteno nga na-stranded ha Cebu.
Ini an iginpasabot ni Leyte Governor Mic Petilla han iya igkahimangraw an mga kaapi han media yana nga adlaw. Sumala ha iya, hadin Huebes pa hira nagpadangat hin request ha Cebu IATF para hini nga panuyu-anan.
Nagsering hi Petilla nga deri la basta-basta nga deri kita makarawat han nagkakabalik nga mga na-stranded kay katungod nira bumalik ha ira lugar, pero tungod han nagtitikadamo nga natatapnan han COVID-19 ha Leyte, naghangyo na hiya han IATF ha Cebu nga deri la anay ini igpadayon.
Kakulop, an Baybay City-LGU in nagpasamwak na nga deri la anay hira makarawat hin bisan hin-o nga residente nga mauli tikang ha Cebu. Ini in dara kay napupuno na an ira Isolation Facilities. An Baybay in mayda 20 na nga nagpositibo han virus, labot han damo pa nga iba nga nagkaka-ada han ira kwarentina. Kasagaran han mga nag positibo ha Baybay in tikang ha Cebu.
Hi Petilla in nagdugang pa nga iya na ginlalauman hanhadi pa nga magtitikadamo an positibo nga kaso denhi ha Leyte dara gud man han pagtugot nga makabalik na an mga na-stranded. Pero iya igindig-on nga kinahanglan deri tigda ngan sunod-sunod an pagpa-uli kay maabot an panahon nga deri na makaka-akomodar an mga Quarantine Facilities ngan Isolation Units han probinsya ngan mga munisipalidad.
Sanglit an maupay buhaton, suspenderon la anay an pagpabalik tikang ha Cebu han mga Locally Stranded Indivuduals (LSI) ngan kun humukal na an mga pasyente ha Isolation Units ngan mga na-istar ha Quarantine Facilties, igpapadayon na liwat an pagpabalik han LSI, sering pa han amay han probinsya.
An Cebu City an nangunguna yana ha ngatanan nga syudad han Pilipinas han gidadamu-i an natatapnan han kagaw kada adlaw. Naka-insima na an Cebu han Quezon City nga amo hadto an may pinakadamo nga kaso han corona virus. An Leyte in mayda na sobra 70 an nakumpirmar nga natapnan han virus. # (KEVIN SIOSANA)
