Isumat.com/8:30AM, July 10, 2020
Tungod han lockdown ha panahon han pandemya, ginkakabarak-an han mga otoridad nga kadam-an han mga insidente hin pag-abuso ha kababayen-an ngan kabataan in deri narereport ha natutungdan nga ahensya han gobyerno.
Nagpahayag hi Commission on Population Regional Director Elnora Pulma nga tungod kay nagkakatarampo yana ha balay an bug-os nga pamilya hin hilawig nga panahon dako liwat an posibilidad nga maghitaas an insidente nga pagtalapas han Republica Acta 9262 o Violence Against Women and Children (VAWC).
Kasumpay hini, an POPCOM ug an PNP in mahugot an pagmonitor basi protektaran an katungod han mga kababayen-an ngan kabataan.
Denhi ha Region 8, umabot na ha 275 kaso han pan-abuso ha ilarum han VAWC tikang Marso 15 tobtob Hunyo 30. Haruhabubo ini hin 48 porsyento han record han nakalabay nga tuig, pero nagtotoo an Women’s and Child Protection Desk han PNP nga damo an deri narereport tungod han lockdown ngan kwarentina.
Subay han report han PNP kasagaran han mga insidente nga nahipatik in denhi ha syudad han Tacloban. #
