Isumat.com/8:16AM, Enero 26, 2021
Sugad-sugad nga waray na kalidad ngan deri na tinood an mga engkwentro han sikat nga mga boksingero.
Hadin nag-agi nga pira ka bulan, hira Floyd Mayweather, Roy Jones, Mike Tyson ngan Connor McGregor in nagkaada hin mga exhibition bouts. Ngan naghakot hira hin salapi tikang han moro-moro nga mga away.
Alagid-agid nga masunod hini an iginkakaparayaw han Pilipinas nga hi Manny Pacquiao. Kakulop, Enero 25, lumutaw an mga notisya nga ginlalatag na an pinal nga mga detalye para han banga-ay nira Pacquiao ngan American Boxing Sensation Ryan Garcia. Posible yana nga semana pormal ig-anunsyo an ira duelo nga bubuhaton hiton Marso o Abril ha Amerika.
Iginbuyagyag ni Steve Kim, usa nga respetado nga Korean-American Sports Journalist nga pasalida la ini nga Pacman-Garcia Bout. Sumala kan Kim, imposible matabo an tinood nga fight kay pagkakastiguhon la han ganador nga hi Pacman an sunoy nga hi Garcia. Deri matugot an kampo ni Garcia nga hihimoon la nga target ni Pacman an ira manok.
Dako gihapon ini nga disbentaha kan Ryan kay aada hiya ha lightweight division (135 pounds) samtang hi Manny komportable tikang ha 140 tobtob 147 pounds.
Kun magin exhibition la ini, waray maghihima-ol-ol ngan waray daog ngan waray perde.
An WBC nga titulo ni Pacquiao in deri gihapon nakataya dida hini nga asdangay ngan deri madudum-itan an record ni Ryan nga 21 nga daog, waray perde ngan 18 nga KO wins. Dako liwat ini nga bulig ha career ni Ryan kay igkaka-atbang hiya han super-sikat nga Pacman.
An paki-ana: Damo ba an magastos para la makagkita hin “showbiz” nga laban? Sumala han mga eksperto, damo la gihapon an mabayad hin porlomenos 80 Dolyares basi maka-agom han Pay-Per-View Television. Damo man gud an hangol ha boxing bisan moro-moro- la labi na kay kulang hin kirita-on yana nga panahon han pandemya.
An 22-anyos nga hi Ryan in presko tikang han iya KO Victory kontra kan Luke Campbell hadin Enero 2. Samtang hi Pacquiao in naka-iskor hin dako nga daog kontra kan anay kampeon Keith Thurman hadton 2019.
Sering paman ni Kim, hira Pacman ngan Ryan in damo an tagsa-tagsa nga mga fans, sanglit deri imposible nga damo an matitirok nga salapi tikang han Pay Per View. Ginklaro ni Garcia nga deri man ginpipirit an mga boxing fans hin pagkita, an maruruyagon man la.
Hi Manny in mayda 2 Million followers ha Twitter ngan 6 Million ha Instagram. Ha luyo nga bahin, mayda naman 8.2 Million followers ha Instagram hi Ryan. Amo ini an ira tatargeton nga magbayad ha Pay-Per-View.
Hi Ryan amo yana an WBC Interim Lightweight Champion, samtang an Fighting Senator amo naman an WBC Welterweight King.
An magdadaog: Segurado hira Pacquiao ngan Ryan kay maghahabak hira hin dolyares katapos han moro-moro nga laban.
DEAL OR NO DEAL ?
