(Photo by Sun Star)

Isumat.com/9:03AM, Enero 26, 2021

Iginpatapod han Department of Agriculture Regional Office nga babaydan han gobyerno an mga tag-iya han baboy nga natapnan o posible natapnan han African Swine Flu (ASF).

Hi Francis Rosaroso, tagyakan han DA-Region 8 in nagpahayag ha iFM-RMN Tacloban nga mayda naka-andam nga pondo an ira buhatan han sugad hini nga mga panhitabo.

Kun manunumduman, an mga bungto han Abuyog, La Paz ngan Javier ha probinsya han Leyte in na-apektaran na han ASF. Iginsumat ni Rosaroso nga tobtob han Enero 25, maabot na hin 1,600 nga kababuyan an pinanmatay basi kabalabgan an pagsarang han kagaw.

Didto ha Abuyog, an LGU in magbabayad hin tag 5 Mil para han dagko ngan 2 Mil para han gudti nga baboy. Ini nga kantidad in tutupngan han DA sanglit magigin doble an kabaraydan ha kada usa nga baboy.

Ha bungto han Javier, nagsering an LGU nga depende ha kabug-aton han baboy an ira igbabayad ngan mayda liwat parehas nga balor an counterpart han DA.

Nagsering naman an LGU La Paz nga waray pondo an ira lokal nga gobyerno para hini, sanglit masarig nala hira ha DA.

Nag-esplikar naman hi Rosaroso nga unta intindihon han mga tag-iya han baboy kun medyo magdugay an pagbayad. Sumala ha iya, porlomenos maabot hin lima ka bulan an pag proseso han pagbayad kay aaprobaran pa ini han DA-Central Office ug an Department of Budget and Management an magbubukalas han pondo.

Gintagan pa hin duon ni Rosaroso nga hag-id an ira hihimoon nga dokumentasyon han pagbayad kay ira gud seseguraduhon nga tinood nga may baboy nga apektado han ASF an mga benefeciario.

Iginpatapod gihapon han DA nga ginpahuruhugtan pa yana an monitoring han mga LGUs kontra hini nga sakit han baboy. Haros ngatanan na nga lugar ha Eastern Visayas in mayda ban o pagderi nga makasulod an mga produkto hin baboy tikang han nasabi nga mga bungto sugad man an tikang ha Luzon ngan Mindanao. #