Isumat.com/9:58AM, September 27, 2020
Malinangpuson nga nakagdepensa hi John Riel Casimero han iya WBO bantamweight title pinaagi hin 3rd Round Knockout kontra han challenger nga hi Duke Micah han Ghana dida han ira asdangay ha Estados Unidos yana nga adlaw.
Iginpasundayag han kampeon nga taga Ormoc City an makamaratay nga mga bunal han iya palunayon an 27-anyos nga hi Micah dida han lkatulo nga hugna kun diin napwersa an referee nga undangon na an away basi deri na mahimutang pa ha peligro an challenger.
Dida han 1st round, nakigdunganay hi Micah kan Casimero ngan nakigbalyu-ay hin maglapirit nga mga yabo. Pero han sunod nga round, nagbul-iw hi Casimero hin left hook nga naka-igo ha ulo ni Micah. Dida hini, natumba an challenger pero naningkamot pakatindog, sanglit ginpa-arakan na liwat hiya hin mga suntok han Ormocanon. Nakatalwas hi Micah dida han 2nd round tungod kay natapos an hugna.
Pero pag-abri pala han 3rd round, ginpuruput-an dayon ni Casimero an challenger. Hi referee Steve Willis in nagpa-undang han laban han maigo hi Micah hin poderoso nga left hook nga nagpatiklop han iya tuhod.
Sumala kan Casimero, iya iginbuhos an ngatanan nga iya kahangit dida hini nga away tungod han waray madayon nga ira unification bout ni WBA bantamweight king Naoya Inoue han Japan.
Kun manunumduman, hira Casimero ngan Inuoe in magkakabanggaay unta hadton Marso, pero waray madayon tungod han pandemya. Igin-ugsod ini ha Agosto, pero an Hapones in waray na liwat makabiyahe ha Amerika, sanglit namiling nala hin iba nga igkaka-atbang hi Casimero.
Nagsering hi Casimero nga nahahadlok ha iya hi Inoue sanglit damo an pasangil basi la deri madayon an ira asdangay. Gin-utro ni Casimero an pag-ayat han Hapones nga deri na maghimo pa hin mga rason. Kun puede ngani, bisan ha Japan pa himoon an ira pagsurapo, basta madayon la ini, pahayag pa ni Casimero.
Hi John Riel in may bitbit nga 30 nga daog, 21 pinaagi hin KO ngan upat nga perde. Ha luyo nga bahin, hi Micah an nag-antos han iya syahan nga perde ha sulod hin 24 nga away. #
