Isumat.com/7:47AM, July 20, 2020
Bumalik ha panig han gobyerno in usa nga lider han New People’s Army upod an iya misis ha bungto han San Jose de Buan, Samar.
Ginkilala an nasabi nga opisyal han NPA ngahi Silverio Gabane alias Ivy, residente han Brgy Hibacaan han mao nga bungto. Hi Gabane an gintutudlok nga lider han Sub-regional Operating Coomand han Sub-Regional Committee Browser han Eastern Visayas Regional Party Committee han CPP-NPA.
Sumurender gihapon an iya misis nga hi Emily Rebato alias Rinrin, nga miembro han Samar Provincial Party Committee. An magti-ayon in nagtubyan hin M14 nga riple ngan kalibre 45 nga pistola upod in mga bala. Hira in nagsurender kan Mayor Joaquin Elizalde ngan mga opisyales han 87th Infantry Battalion.
An mag-asawa in makaka-agom han ayuda pinansyal ngan programa ha pagpakabuhi ha ilarum han Enhanced Comprehensive Local Integration Program (E-Clip) tikang ha National Government sugad man an Local Social Integration Program (LSIP) han Samar Provincial Government.
Hadton Hulyo 15, mayda gihapon duha nga rebelde an nagsurender ngadto han LGU ngan nagtubyan hin mga armas ngan mga bala.
Padayon naman an pag-aghat ni Elizalde ha mga rebelde dida han iya nasasakupan nga bungto nga sumurender gihapon ngan makatagamtam han mga programa han gobyerno ngan magin mamurayaw na an ira kinabuhi. #
