Isumat.com/9:20AM, September 9, 2020
Bisan kun naghahabak na hin damo nga pasidungog hi Giannis Atetokounmpo, magigin mabidoon an iya aabaton tungod kay ginsikaran na an Milwaukee Bucks ha NBA Playoffs.
Napakyas an ambisyon ni Giannis nga magin kampeon ha NBA han pagtamakan hira han Miami Heat dida han Game 5 han best of seven series ha score nga 103-94 . Tungod hini, nadag-an han Miami an asdangay (4-1) ug hira in nakasulod na ha Eastern Conference Finals.
Balanse an scoring han Miami kun diin unom han ira players in nakahimo hin sobra 10 puntos kada usa. Nagmalahimo an Bucks hin pag-ato pero klaro gud nga dehado hira kay waray na makagmulay hi Giannis dara han iya ankle injury.
An Miami in nagpapamulat han resulta ha serye han Boston ngan Toronto. Magkaka-atbang an Celtics ngan Raptors buwas para han Game 6. An Celtics in nakaka-igbaw dida han serye, 3-2.
Hi Giannis an natudlok nga Defensive Player of the Year, miembro han All-Defensive Team ngan dako an posibilidad nga magin back-to-back MVP pero nagtatangis dara han kabido-an nga deri matutuman yana an iya inop nga magin kampeon.
Samtang, iginpasamwak naman han NBA an mga players nga napili komo kaapi han All-Defensive Team han liga para han 2019-2020 Season. An 1st Team in ginkokomponer nira Defensive Player of the Year Atetokounmpo (Milwaukee), Marcus Smart (Boston), Ben Simmons (Philadelphia), Anthony Davis (Lakers) ngan Rudy Gobert (Utah).
An miembro naman han 2nd Team amo hira Patrick Beverly ngan Kawhi Leonard han Clippers, Eric Bledsoe ngan Brook Lopez han Milwaukee, ngan hi Bam Adebayo han Miami Heat. #
