Isumat.com/11:53AM, September 9, 2020
An mga “senior citizen” han Los Angeles Lakers an nagin susi han ira pagbunalan an Houston Rockets, 112-102, dida han Game 3 han Western Conference Semifinals. Tungod hini nga pakadaog, abante na ha serye an Lakers, 2-1.
Hira Lebron James, 35 anyos, ngan Rajon Rondo, 34-anyos, amo an nagbida para han Lakers. Hi James in nagpa-arak hin 36 puntos, samtang 21 puntos naman an igindeposito ni Rondo. Hi All-Defensive Team Member Anthony Davis in naghimo hin 26 puntos.
Ha panig naman han Houston, 33 puntos an natirok ni James Harden ngan 30 puntos an nahikay ni Russel Westbrook. Pero waray makaparayaw an supporting players han Rockets ngahira Eric Gordon, PJ Tucker ngan Austin Rivers sanglit kulang an ira scoring.
Nagin mahugot an oyag tobtob han 3rd quarter kay natapos ini ha tabla-82 an score. Pero pag-abri han 4th period naubusan hin bala an Rockets kay 20 puntos nala an ira nahimo, samtang an Lakers in nagpa-uran hin 30 puntos.
Naangkon han Rockets an pagdarag-an dida han Game 1, pero an sunod nga duha nga mulay an iginbulsa han Lakers. An ika-upat nga asdangay in matatabo hiton Biernes, Setyembre 11. #
