Isumat.com/1:48PM, August 14, 2020
Katapos hin 35-anyos tikang matabo an brutal nga panmatay, nadakop han mga otoridad in usa nga babaye nga kaapi han New Peoples Army nga may kalabutan han pagmasaker han ira igkasi mga rebelde.
Ginkilala an suspetsado nga hi Luzviminda Orillo alias Remy, 54 anyos, inasaw-an, ngan nag-uukoy na yana ha Brgy San Pablo, Naval, Biliran. Hiya in na-aresto han kapulisan hadton Mierkules didto han nasabi nga barangay. Gin-aresto hiya pinaagi han warrant of arrest nga iginpalusad han Manila RTC Branch 32 dara han kaso nga 15-ka ihap hin Murder.
Iginpahayag han Biliran PNP Office nga han naglabay nga mga katuigan, nagin mamurayaw an pag-ukoy ni Orillo didto han barangay ngan sugad-sugad nga deri na mabubuksot an iya paghilambigit han krimen. Pero an mga otoridad in waray humunong han paghalpat tobtob nga natudlok kun diin hiya nagtitinago.
Gin-aalegar nga hi Orillo in kaapi anay han NPA kun diin an iya grupo in lakip dida han naghimo han gintawag nga “Oplan Venerial Disease” hadton dekada 80. Ini nga operasyon han mga rebelde nga kumunista amo an pagpatay han ira mga miembro nga gintatahapan nga lumimbag na an suporta ngadto han gobyerno.
Lakip han mga ginpanmatay an sobra 60 nga mga rebelde nga iginlubong ha mass grave ha kabubkiran han Inopacan, Leyte hadton 1985.
Nakatalaan nga igbiyahe hi Orillo ngadto ha Manila kun diin padayon nga ginbibista an kaso. Han nag-agi nga mga katuigan, mayda na gihapon mga lideres han kumunista nga kagi-usan nga nagpapaluyo hini nga panhitabo an nadakop han mga pwersa han gobyerno. (Photo by Biliran Island News)#
