Isumat.com/7:19AM, November 16, 2020
Ma-arangkada na an proseso basi magbaton ha balaud an mga rebelde nga nagkadadakop ha operasyon han pulisya ngan militar ha Carigara, Leyte han nag-agi nga semana kun diin pira nga menor de edad an nasalbar tikang han walhon nga kagi-usan.
Iginpahayag han 93rd Infantry Battalion han Philippine Army, an mga kaso nga igsasalawad kontra han mga suspetsado in illegal possession of firearms, ammunitions and explosives. Gin-aadman gihapon an posible nasupak nga mga balaud han mga rebelde tungod han gin-aaligar nga pag-recruit hin mga menor de edad.
Dida han Nobyembre 14, 2020 an mga elemento han Carigara PNP ngan Alpha Company han 93rd IB in nagdumara hin operasyon ha Brgy Canlampay, Carigara. Nakadiskubre hira hin usa nga kampo han mga kumunista, kun diin nanngalagiw dayon an mga rebelde han maka-abat han presensya han mga tropa han gobyerno.
Dida han paghalpat han mga rebelde, nadiskubre han mga otoridad in usa nga balay harani han kampo nga gintatag-iyahan ni Edencio Dionaldo, alias Bernie Bates, gin-aalegar nga NPA. Hi Dionaldo in naka-eskapo pero an iya asawa nga hi Nora ug an ira 21-anyos nga anak in nadakop han mga otoridad.
Nakarekupo an pulisya ngan militar hin magkalainlain nga armas de fuego, Improvised Expolsive Device ngan mga bala. Nakuha gihapon tikang han balay in mga libro mahitungod han kagi-usan kumunismo ngan subersibo nga mga papeles nga gintotoohan ginagamit ha paghugay hin bag-o nga mga kaapi.
Dida gihapon han nasabi nga balay, mayda unom nga menor de edad. lakip na in 14-anyos nga babaye nga may sakit nga meningitis. Gin-rescue hira han mga tinubyanan han balaud ngan igintubyan ha Social Welfare Office han LGU-Carigara para han kaangayan nga pagtimangno.
Nasikop gihapon han pwersa han gobyerno in 11 pa nga iba nga gintatahapan kaapi han NPA. Hira in nasipatan dida han lugar ngan tarahapan an ira mga gi-os durante han operasyon. #
