Isumat.com/10:35AM, June 17, 2020
Ha atubangan han hangyo nga temporaryo suspenderon an pagpabalik han mga na-stranded nga taga Eastern Visayas didto ha Cebu, padayon gihapon an pagkabalik nira ha aton rehiyon.
Dida han impormasyon tikang ha Philippine Coast Guard, sobra 300 nga na-stranded ha Cebu an nakabalik ha Region 8 kakulop. Duha nga barko an dumu-ong ha Ormoc kun diin sakay in sobra usa ka gatos nga pasahero nga nanguli ngadto han ira tagsatagsa nga bungto.
Didto naman ha Maasin City Port, umabot kakulop in 200 nga mga taga Southern Leyte.
Tobtob han ginsusurat ini nga notisya, an Cebu City in mayda na haros 4000 ka tawo nga natapnan han corona virus. Kasagaran han mga nagpositibo ha Ormoc, Baybay, Bato, Matalom, Hindang ngan upat nga bungto ha Southern Leyte in tikang ha Cebu.
Ha luyo nga bahin, padayon gihapon an pagka-abot han OFWs pinaagi han Tacloban Airport. Kada adlaw, porlomenos 30 nga OFWs an naabot pinaagi han chartered flights.
Tinikangan hadin Hunyo 16, an mga commercial flights nga Manila-Tacloban nga ruta in lima na ka beses kada adlaw. Ini nga mga eroplano an ginsasakyan han iba nga tikang ha Manila ngan Luzon nga deri libre an pamasahe. An iba in nagkakabalik pinaagi hin pribado o ginpapakyaw nga behikulo.
Kadam-an na nga mga Local Government Units ha Sinirangan Bisayas an naghangyo han ira mga kababayan ha iba nga lugar nga deri la anay manguli tungod han nagtitikadamo nga ginmomonitor nga katawhan ngan deri na na-aakomodar ha mga Quarantine ngan Isolation Facilities. # (KEVIN SIOSANA)
