Isumat.com/7:21AM, Septembre 02, 2020
Waray maka-ilob pag-antos han bertud han alkohol, dako lugod nga problema an aatubangon hin upat nga Locally Stranded Individuals (LSI) ha Ormoc City tungod han ira pag tagay-tagay didto mismo han facilidad han kwarentina.
Dida han impormasyon nga iginpagawas ni City Councilor Lalaine Marcos, nag alsa-baso an upat nga LSI nga naka-kwarentina ha Ormoc Covid Ligtas Center ha Brgy Dolores. Nabuksot an ira tagay-tagay kay mayda liwat naka-kwarentina an nagsumbong ngadto han nagbabantay han Quarantine Facility.
Sumala han mga opisyales han City Government, mahugot nga igindederi an sugad hini nga aktibidad labi na ha Quarantine Facility. An upat nga LSI in waray pa maka kumpleto han 14 ka adlaw nga kwarentina.
Tungod hini, gin-aandam na an kaangayan nga mga kaso nga igpapasaka kontra han upat.
Ini nga panhitabo ha Ormoc in usa la han damo nga magaraot nga insidente ha mga Quarantine Units ha Eastern Visayas. Didto ha Dulag, usa nga LSI in naka-eskapo ngan nakig-tagay gihapon ha gawas. Sugad gihapon ini an nahitabo ha Sogod, Southern Leyte kun diin usa nga LSI tikang ha Mindanao an nagparaboot la pag-gawas ha kwarentina ngan nakig-inom ha iya mga kasangkayan. Waray notisya kun nagpakatapon ini nga mga LSI.
An grabe nga panhitabo amo an gin-aalegar nga panlugos han gwardya han Quarantine Unit ha Villaba, Leyte kun diin an biktima in usa nga babaye nga LSI tikang ha Cebu. #
