Isumat.com/1:35PM, July 26, 2020
Mahugot nga ginsusnan ni Ormoc City Mayor Richard Gomez an mga opisyal nga nag-organisar han Hatid-Tulong Initiative kun diin haros 8 Mil nga katawhan an nagbugi-ot ha Rizal Memorial Sports Complex dida han Huebes ngan Biernes.
An yinukot-yukot nga katawhan in ginlalakipan han mga Loically Stranded Individuals ngan mga pamilya ha Manila ngan Luzon nga karuyag na umuli ngadto han ira tagsatagsa nga probinsya dara han kamakuri han kabutangan tungod han krisis durot han COVID-19 Pandemic.
Dida han mga video ngan mga litrato nga nagkagawas, makikit-an nga haros waray na ginigi-usan an ngan naghuhuro-ot an mga tawo didto han lugar ug an iba in napiritan nga gumawas han facilidad ngan kumaturog ha ligid han kalsada tungod han kabaraka nga matapnan han virus.
Iginpapaki-ana ni Gomez kan Presidente Duterte kun hira- hin-o an namumuno hini nga aktibidad. Para han alkalde, waray salabutan an mga opisyal nga nagdumara hini han insakto ngan tuhay nga pag-organisar hin sugad hini kadamo hin tawo. Sugad sugad nga paturapak la kay an social distancing in nawara ngan nagdidirigkit na an katawhan.
Kasumpay hini, hi Gomez in nanawagan kan Duterte nga patalksikon ha pwesto an nag-organisar hini tungod han kawaray pagtagad han kahimtang han panlawas han publiko.
Nababaraka hi Gomez nga damo hini nga LSI an matatapnan dida han ira pagkatitirok ngan an kagaw in dadad-on ngadto han mga probinsya.
Dida han haros 8 Mil nga magkaka-uli, sobra 700 katawo an taga Eastern Visayas. Magbibiyahe an mga LSI dida hiton Hulyo 25 ngan 26 tibalik ha ira tagsatagsa nga lugar.
Denhi ha Rehiyon Otso, sobra na 800 ka tawo an natapnan han kagaw ngan sobra 70 porsyento hini an mga LSI. Damo an nahuhulop nga dida hini nga tigda nga pagka-abot han LSI, malobo liwat an mga positibo han kagaw ha Easternj Visayas. Pira nga mga LGUs an nababaraka nga deri maa-akos han ira mga quarantine ngan isolation facilities kun magtikadamo pa an magkakabalik ngan magkakatatapnan han virus.
An mga ahensya nga nadadabi hini nga Hatid Tulong amo an masunod : Presidential management Staff, Office of Senator Bong Go, DILG, Department of National Defense, DSWD, Dept of Transportation, Dept of Agriculture, OWWA, PAGCOR, League of Municipalities of the Phlippines ug an Office of the President.
Hi Joseph Encabo, Assistant Secretary han PMS, in naghangyo nga unta ma-intindihan han publiko ini nga natabo labi na kay waray hira maglalaum nga sugad hini an kadamo an mapakadto ha Rizal Stadium. Sering ni Encabo, an ira la intensyon nga makabalik na ha mga probinsya ini nga mga LSI tungod kay naghihimakuri an ira kabutangan ha Manila. Iya iginpatapod nga magigin komportable an ira pagbiyahe. #
