Isumat.com/6:00AM, June 14, 2020
Ginpabalik ngadto han lugar nga ira gintikangan an grupo hin mga mangirisda nga nagmalahimo pagdu-ong ngan paghaw-as ha Borongan City, Eastern Samar.
Hi Mayor Jose Ivan Agda in nagmando nga deri tugutan pagdu-ong ha Brgy Sabang an mga pumpboat han 29 nga mangirisda tikang ha Davao Occidental. Ini nga grupo in umabot ha may Sabang Fishport hadton Huebes han gab-i pero nabalabgan han mga otoridad an ira pagdunggo ha pantalan ngan nagpabilin la hira ha ira mga sarakyan pandagat.
Sumala han impormasyon, waray koordinasyon nga natabo ha LGU kasumpay han pagka-abot han grupo ngan kulang han kaangayan nga mga dokumento. An iginpapakita la han mangirisda amo an Health Certificate.
Minanduan naman ni Agda an City Legal Office nga magpagawas hin Show Cause Order ngadto han tawo nga gin-aalegar naghimo hin paagi nga bumiyahe ha Borongan ini nga mga mangirisda ngan nagpatapod pa nga makakasulod hira han syudad.
Ini nga tawo in gintagan hin lima ka adlaw basi mag-esplikar han iya panig kay kun deri hiya makabaton hin insakto, namimintana an pagsampa hin kaso kriminal ha iya dara han pakasupak han mga balaud han syudad.
An mga miembro han Philippine Coast Guard, Borongan PNP ngan Barangay Officials in nag-escort han lima nga sakayan tipagawas han kalalawdan nga sakop han Borongan basi bumalik hira ha Mindanao.
Ha luyo naman nga bahin, iginreport han Borongan Information Office nga mayda usa nga VIP (Very Important Person) an waray magpa-ilarum han insakto nga proseso ha checkpoint. Natabo ini kagab-i antis mag alas 8 an takna ha Brgy Locsoon, Borongan City.
An report in nagpapahayag nga sakay hin usa nga van an VIP ngan may escort nga duha nga big bikes han Highway Patrol Group. Gin-aalegar nga waray ini umukoy dida han checkpoint ngan paspasay nga lumusot. Waray gihapon kaangayan nga koordinasyon an grupo ngadto han LGU antis hira umabot.
Kasumpay hini, kadagmitan iginmando ni Agda nga imbestigaron ini han Borongan PNP Office ngan kun maprobaran nga may gintalapas nga patakaran posible salawdan hin kaso ini nga VIP ug an iya mga ka-updanan. Waray pagngarani han City Information Office an nasabi nga VIP. # (KEVIN SIOSANA)
