Isumat.com/7:15AM, July 26, 2020
Imbes nga mag-aandam para han pagbalik han pagtutdo ha eskwelahan, mag-aandam lugod pag-atubang hin kaso tungod han iligal nga droga in usa nga maestro.
Hi Aladin John Ricaldo, waray asawa ngan maestro ha pampubliko nga eskwelahan, in na-aresto han mga otoridad dara han pagbaligya hin iligal nga droga.
An mga operatiba han PDEA-Region 8, PNP Leyte Drug Enforcement Unit ngan Calubian PNP an nagdumara han buy-bust operation didto ha Calubian kun diin nag-uukoy an suspetsado.
An mga otoridad in nakakumpiskar hin 11 ka sachet hin gin-aalegar nga shabu ug an kwarta nga gingamit dida han operasyon. An suspetsado in gintutudlok nga “street-level target.”
Hi Ricaldo in maatubang yana han kaso kasumpay han iya pakatalapas han Comprehensive Dangerous Drugs Act of 2002.
Sumala han surok han Isumat.com, an suspetsado in nagmama-estro ha pampubliko nga eskwelahan ha usa nga bungto ha probinsya han Leyte. #
