Isumat.com/7:51AM, October 17, 2020
Tungod han depresyon nga gin-antos kay natapnan han Covid-19 an duha niya nga anak, nagpakamatay in usa nga maestra ha elementarya ha Dulag, Leyte.
Dida han imbestigasyon han Dulag PNP, ginkilala an biktima nga hi Laline Cano, 47, anyos, inasaw-an, ngan nag-uukoy ha Brgy San Vicente han nasabi nga bungto.
Mismo an iya mister nga usa gihapon nga magturutdo an nakadiskubre han nabitay pinaagi hin nylon cord an lawas han iya ginang-maybahay ha ilarum han hagdan han ira balay. Banda alas 6 han aga an oras, Oktubre 16, han matad-an an nabitay nga lawas han biktima.
Kadagmitan iginreport ini ha PNP ngan gintalinguha pa nga madara an biktima ha Rural Health Unit han bungto pero pag-abot ngadto igindeklarar nga Dead on Arrival.
Subay han pag-asoy han iya mister nga hi Eluesir Cano, duha na ka adlaw nga duro an kabido ngan waray mamumutang an iya asawa. Waray na gihapon ini mangangaturog tungod han depresyon dara han pagpositibo han Covid han ira duha nga anak. Waray gihapon magdadahum hi Eluesir nga mahihimo ni Laline nga mag-suicide.
Ha iba naman nga notisya, patay an usa nga Stall Owner ha merkado publiko ha Ormoc City han pusilon hiya temprano pa han gab-i, Oktubre 16, 2020.
An biktima an ginkilala nga hi Rand Kelvin Catingub, 37-anyos, residente han Brgy Casilda, Merida, Leyte. Hiya in mayda pwesto ha Building B ha Ormoc Public Market.
Hi Catingub in pinusil hin waray hikilal-i nga suspetsado didmo mismo ha merkado. Padayon yana an imbestigasyon han Ormoc PNP basi matudlok an suspetsado ug an motibo han krimen. #
