Isumat.com/8:35AM,June 29, 2020
Ha atubangan han paghimakuri ngan pag-antos han mga taga Tarangnan, Samar dara han COVID-19, nakahimo pa in usa nga senior citizen pagpalamadya han pagkababaye hin usa nga daragita.
Sumala han report han Tarangnan PNP, nakakarawat hira hin sumbong tikang hin usa nga barangay kapitan mahitungod hin gin-aalegar nga panlugos nga natabo didto han iya lugar.
Ginkilala an suspetsado nga hi Ricardo Teonilo, 70 anyos, may asawa,parag-uma ngan residente han munsipalidad.
Dida han kulop han Hunyo 27, nakarawat han PNP an impormasyon han insidente han pan-abuso. Ginkadto han mga otoridad an panimalay han menor de edad nga biktima. An daragita amo an nagtutdo han balay ni Teonilo ngan gindakop hiya han mga pulis.
Iginpaslak ha karsel an suspetsado ngan nakatalaan umatubang han kaso kontra ha iya. # (KEVIN SIOSANA)
