Isumat.com/9:20AM,June 30,2020
Samtang padayon an paghitaas han mga natatapnan han COVID-19 ha Eastern Visayas, nalanat man liwat an nagtitikadamo nga nakakatalwas tikang han virus.
Dida han gibabag-uhi nga report han DOH-Regional Office, mayda na 218 nga pasyente ha aton rehiyon an naka-recover. Kakulop (Hunyo 29) 22 an naka-recover. Kakulop gihapon, 25 an nahidugang han Positive Cases sanglit umabot na ha 524 an sumatotal han mga nagkatatapnan. Ini nga recoveries in 41 porsyento han mga nadarahigan han kagaw. Nagpapabilin naman nga tulo nga pasyente an namatay.
Dida han 25 nga bag-o nga pasyente, siyam ha ira in residente han Bato, Leyte. Dara hini maabot na hin 20 katawo an natapnan didto hini nga bungto ngan haros ngatanan mga Locally Stranded Individuals.
Tulo naman nga kaso an nahidugang ha Barugo, Leyte. Iginsumat han LGU-Barugo nga ini hira amo in 65 anyos nga lalaki tikang ha Caloocan; 63 anyos nga babaye tikang ha Taguig City; ug 6 ka bulan pala an edad nga lalaki ug apo hiya han tikang ha Taguig nga babaye.
Ha munisipalidad han Leyte, Leyte, an natapnan in 15-anyos nga lalaki tikang ha Quezon City; samtang an bag-o nga kaso ha Kananga, Leyte in tikang ha Manila. Mayda liwat usa nga kaso ha Tabontabon ngan duha an taga Ormoc. Waray pa maghatag hin detalye an Tabontabon ngan Ormoc han ira bag-o nga Positive Cases.
Didto naman ha Southern Leyte, upat nga kaso an nahidugang ha Maasin City. Tulo nga kalalakin-an ngan usa nga babaye hira nga tikang ha Cebu. Samtang an bungto han San Juan an nagrehistro han ira syahan nga COVID Positive Case.
Ha probinsya han Samar, mayda bag-o nga kaso an San Sebastian pinaagi hin usa nga LSI; samtang usa liwat an nahidugang ha Daram, Samar.
Nahipatik naman an syahan nga kaso han COVID-19 ha Victoria, Northern Samar. Hiya in 27 anyos nga lalaki nga na-stranded ha Cebu. Posible nga an nakatapon ha iya an nagpositibo ha Calbayog han una nga semana kay magkasakay hira han barko han ira biyahe tikang ha Cebu.
Iginkalipay naman han mga Estehanon kay nakatalwas na ha COVID an pasyente nga taga Mercedes, Eastern Samar. Duha na ka beses nga nagnegatibo an iya repeat testing sanglit fully-recovered na hiya ug an iya mga contacts in negatibo gihapon an resulta.
Tungod hini, makokonsiderar nga COVID-free na liwat an probinsya tungod kay an nagpositibo nga taga Borongan City in natapnan ngan nagtatrabaho ha Tacloban. # (KEVIN SIOSANA)
