Isumat.com/12:15PM, September 27, 2020
Katapos hin 10-anyos nga paghinulat, makakatilaw na liwat an Los Angeles Lakers han pakig-asdangay para han titulo ha NBA.
Ini in kataliwan la nga igmodmod han Lakers an Denver Nuggets, 117-107, dida han Game 5 han ira Western Finals Series kun diin naka-igbaw an LA, 4-1. Dida pa han 2010 an katapusan nga nakasulod an team ha Finals ngan napulo ka tuig an ginhulat ngan nagkinahanglan pa han pagbalhin ha grupo ni Lebron James ngan Anthony Davis.
Ginpamatud-an nira james ngan Davis nga waray magsayop an Lakers han pagkuha han ira serbisyo. Dida han game 5, hi Lebron an nagpadig-on han daruhunon nga natikarasa an alak kun nagtitika-iha. Ha edad nga 35-anyos, nagpatik hi Lebron hin triple double (38 pts, 16 rebs, 10 assists) basi giyahan an LA ngadto ha Finals.
Nagraranggat an pasundayag ni King James ha 4th quarter kun diin nagpa-arak hiya hin 18 puntos. Ha luyo nga bahin, bisan kun nag-i-ingka hiya tungod han injury ha wala nga mokubuko, nagrehistro hi Davis hin 27 puntos ngan 5 rebounds.
Dako gihapon an kontribusyon han iba nga players han LA : Danny Green(11 pts), Alex Caruso(11 Pts), Dwight Howard(9pts, 9 rebs) ngan Rajon Rondo(8 pts, 4 assists).
Ha panig han Denver, Nicola Jokic ngan Jerami Grant in mayda tag-20 puntos, samtang hi Jamal Murray nga nag-antos hin karamtan ha too nga tuhod in nakahimo la hin 19 puntos.
An Lakers in naka-lamang hin 16 puntos ha 3rd quarter, pero nagin madig-on an kasingkasing han Denver nga ira nalanat ngan nakatabla pa ha 84. Pero dida han katalimutngaan han last period, ngatanan nga pagtarhog han Denver in ginpaparong han mga pikada ni Lebron.
Ngatanan han kada-ugan han Lakers ha play-offs in pinaagi hin 4-1 nga kartada. Amo ini an natabo kontra Portland ha 1st round, ngan kontra Houston ha ikaduha nga hugna.
Humugpoy naman an milgaro nga ginhihinimo han Nuggets. Dida han 1st round nakatukdaw hira tikang ha 1-3 deficit basi perdihon an Utah ngan dida han 2nd round, ira gihapon ginpakalasan an llamado nga Clippers ngan nakasalbar hira tikang ha paghilodlod nga 1-3.
Pero ini nga misyon han batan-on nga Nuggets in nawara nga baga hin bura han ira na igkasurapo an duro ka ekspryensyado nga Lakers.
Ini an ika-napulo ka beses nga pakasulod ni Lebron ha NBA Finals dida han iya 17-anyos nga karera han liga, samtang ini naman an syahan para kan Davis nga naghulat anay hin walo ka tuig antis hiya makamartsa ha Finals.
Maghuhulat pa yana an Lakers basi matudlok kun hin-o an ira igkakakumbati ha kampeonato. An Miami Heat in nakaka-abante ha serye, 3-2, kontra han Boston Celtics dida han Eastern Conference Finals.
