Isumat.com/2:55PM,July 13, 2020
“Kay aanuhon pa man an mga yakan, an mga pulong kun patay na an mga tawo?”
Ini an katapusan nga linya dida han resignation letter nga iginpadangat ni Jerry Gracio ngadto han iya superbisor ha Komisyon ng Wikang Pilipino. Hi Gracio an nagdemiter han iya posisyon komo Commissioner for Samar-Leyte Languages.
Ini an ikatulo ka beses nga nagbul-iw hi Gracio han iya posisyon ugaring la kay waray kakarawata an iya pag-resign kay waray makakabiling hin maliwan ha iya.
Pero yana nga adlaw, Hulyo 13, igindig-on han Multi-Awarded Poet ngan screenwriter nga deri na hiya magpapadayon pagserbe hin “pasista nga gobyerno”. Iya iginpahayag nga komo usa nga tagsurat, deri na niya maaantos pagserbe hin administrasyon nga deri naghahatag hin importansya han katungod pantawo ngan libre nga pagpahayag.
Hi Gracio in natawo ha Tondo, Manila, pero han batan-on pa hiya an iya pamilya in nag-istar ha Brgy Nenita, Mondragon, Northern Samar. Lakip han iya ginsurat an siday nga “Waray Hi-unong sa Gugma” ug an istoryahon nga “Tacloban.”
Hiya in nakagtapos han kurso nga Malikhaing Pagsulat ha UP-Diliman. Naka-angkon hiya hin kadam-an nga mga pasidungog upod na denhi an Carlos Palanca Memorial Award for Literature; Screenwriter Prize tikang ha Film Academy of the Philippines; 2005 Poet of the Year tikang ha Komisyon ng Wikang Pilipino; sugad man an Gawad Likhaan ngan kadam-an pa nga iba. Hapagkayana, hiya in nag-uukoy ha Valenzuela City kun diin ginpasidunggan hiya han Gawad Dr. Pio Valenzuela, an gihataasi nga pagsaludo han mga magkarit nga residente han syudad.
Hadton 2013, natudlok hiya nga komisyuner han nasabi nga ahensya ngan durante han paglingkod ha katungdanan ni Presidente Duterte, duha na ka beses hiya nagbul-iw ha pwesto pero waray kakarawata kay nagbibiling pa hin igliliwan ha iya. Yana an iya ikatulo nga pag-resign ngan iya igindig-on nga bisan pa waray lumiwan ha iya, deri na hiya magseserbisyo.
Ha panig naman han Malakanyang, nagsering hi Presidential Spokesperson Harry Roque nga desisyon ni Gracio an pag-resign ngan kun ano man an iya iginpamulong iya la adto opinyon. #
