Isumat.com/8:28AM, August 19, 2020
Ha atubangan han pakimalo-oy han mga otoridad han panlawas ha publiko nga likyan la anay an pagtitirok ha panahon han pandemya, mayda la gihapon mga insidente kun diin nagtatarampoog in damo nga katawhan.
Ini nga mga pagtitirok an naka-alarma ngan nakabido kan Abuyog Mayor Lemuel Traya kun diin may mga natabo nga sugad hini ha iya bungto nga nasasakupan han nag-agi nga mga adlaw. Usa na hini an gintutudlok nga gindumara han sekta o relihiyon nga Assembly of God. Nakadangat an impormasyon kan Traya nga naghimo hin Youth Camp an nasabi nga hugpo didto ha Brgy Libertad.
Dida han nakadangat nga mga litrato ngadto han alkalde, klaro gud nga damo ini nga mga partisipante han aktibidad ug waray pa gud mga face mask ngan deri nagtutuman han physical distancing. Nabido hi Traya hini nga panhitabo kay sumala pa ha iya, waray naman la ngani magpasabot an grupo nga mayda nira sugad hini nga aktibidad.
Nagpapaki-ana hi Traya ngadto han hugpo kun deri ba natatapnan han Covid an ira mga miembro. Igindugang pa ni Traya nga nawoworok hiya kun kay-ano magbubuhat hin sugad hini an nagpapakilala nga mga Diyosnon an pamatasan. Kadam-an liwat nga mulopyo han bungto an nagsukna hini nga aktibidad.
Ha iba pa nga panhitabo ha Abuyog, pira liwat nga barangay ha Upper-Dagat nga parte han bungto in nagkatitirok ngan mayda pa alegasyon hin iligal nga huygo nga gindumara.
Ginmanduan han alkalde an mga opisyales han mga barangay nga nadadabi nga panginanoon ini nga mga insidente. #
