Isumat.com/9:13AM, October 7, 2020
Tulo ka ihap han kaso nga Attempted Murder (Firearms absorbed as aggravating circumstance) an aatubangon ni Atty Ryan Villablanca ngan 12 pa nga iba tungod han insidente hin pagpabuto hin pusil ngan karekupo hin mga armas de fuego tikang han iya grupo ha Tacloban City hadton nag-agi nga Biernes, Uktobre 2, 2020.
Dida han nakuha nga impormasyon han Isumat.com, ginresolbar na han piskaliya an reklamo nga iginpasaka han Tacloban PNP kontra han grupo ni Villablanca. Nagdesisyon an piskaliya nga igsampa ha korte an kaso nga 3 Counts of Attempted Murder (Firearms absorbed as aggravating circumstance).
Iginrekomandar gihapon han City Prosecutors Office an 120 Mil nga piyansa ha kada usa nga ihap han kaso para han tagsatagsa nga mga akusado. An kampo ni Villablanca in posible magmosyon nga pahabub-an an piyansa.
Hadton pasado alas 6 han aga, Uktubre 3, iginreport hin security guard han propyedad ni Dr Mario Quijano nga mayda armado nga kalalakin-an didto han ira lugar ha Brgy 106, Sto Nino, Tacloban. Igin-aligar nga nagpubuto an mga suspetsado han ira armas de fuego ngan naghimo hin kasamok.
Nagresponde an kapulisan ngan narekupo tikiang han grupo in magkalainlain nga klase hin pusil nga ginlalakipan hin M-16, shotgun, duha nga kalibre 45, usa nga magnum 357, revolver nga pistola ngan mga bala.
Labot la han abogado, maatubang gihapon han mga kaso an iya mga kaupdanan ngahira Heram Ladrera, Rondio Pasagui, Michael Millarada, Felipe Loya, Jody Loreno, Reynaldo Anota, Jomar Condes, Benigno Sequito, Lito Caminong, Allan Lucimano, Andres Tangpuz ngan Randy Costudio.
Hi Villablanca in anay Vice-Mayor han Pastrana, Leyte samtang hi Quijano in anay Mayor han Pinabacdao, Samar.
Gintotoohan nga dilito ha propyedad ha butnga han abogado ngan doktor an ugat hini nga panhitabo. #
