Isumat.com/7:55AM, July 28, 2020
Usa an patay, usa an samaran ngan lima pa nga preso an ginhahalpat han mga otoridad dida han natabo nga jailbreak ha Calbayog City Jail kakulop (Hulyo 27, 2020).
Dida han imbestigasyon, pasado alas 2 han kulop natabo an pagpuga hin walo nga preso. Iginmalatumat nga naka-tiempo an mga preso han abrihan an gate han bilanggu-an kay magdedeliber hin tubig an water district ngadto han presuhan. Dida hini tigda nandadlagan tipagawas an walo nga preso ngan kumarida tipakadto han bukid ha Brgy Gadgaran.
Kadagmitan nga umaro hin ayuda an City Jail ha Calbayog PNP ha pagdumara han paglanat ngan pagdakop han mga naka-ikyas. Nahisumat nga usa nga preso an namatay ngan usa an samaran han makorner hira pero waray sumugot nga sumurender. Usa naman an nadakop ngan lima pa an padayon nga ginpipinamiling.
An mga nagpaka-eskapo amo an masunod: Nilo Ligason, 36-anyos, taga Brgy Himalandog; Eron Tomboc, 25-anyos, Brgy Panonongon; Edgar Elbano, 45-anyos, Brgy Villahermosa; Edar Balantino, 33-anyos, Brgy Balud; Juvy Openiano, 41-anyos, Brgy Esperanza; Edwin Abria, Brgy Calilihan; Eden Albana ngan Raul Doroja, Brgy Tarabucan han Calbayog.
Ginkilala an namatay nga hi Edwin Abria, samtang an nasamad hi Juvy Openiano, ug an nadakop hi Edar Balantino.
An Calbayog City Jail in aada ha ilarum han pagdumara han Bureau of Jail Management and Penology. #
