Isumat.com/2:30PM, August 12, 2020
Kinahanglan magbaton ha balaud an nag-imbento ngan nagpasarang ha social media han ginmasaker nga porlomenos 20 ka tawo ha usa nga barangay ha probinsya han Samar.
Iginpahayag ni Col. Andre Dizon, an hepe han Samar PNP Office, waray kamatuoran an nagsarang nga impormasyon ha facebook kakulop nga adlaw nga mayda daw ginmasaker nga 20 katawo ha Brgy Patag.
Ini nga impormasyon ha social media in nagsurit hin kahadlok ha katawhan labi na kay hadton Domingo may natabo nga panikas ha Calbayog City kun diin duha ka tawo an pinanmusil ngan namatay ug duha an samaran.
Nagsering hi Dizon peke an balita mahitungod han masaker ngan iya gin-aghat an katawhan nga deri dayon tumood hin mga sumat-sumat ha facebook.
Igindugang pa han PNP Officials nga ira ini papa-imbestigaran ha PNP Anti-Cybercrime Unit basi matudlok kun hin-o an utok hini nga buwa nga impormasyon. #
