Isumat.com/9:20AM, July 22, 2020
Mga Locally Stranded Individuals (LSI) na liwat an bag-o nga nagkatatapnan han COVID-19 ha Sinirangan Bisayas. Sumala han DOH Regional Office, 20 ka tawo han rehiyon an bag-o nga nagpositibo han kagaw dida han ira report kakulop (Hulyo 21, 2020)
An munisipalid han Jiabong, Samar in nahilakip na dida han mga lugar nga mayda pasyente ngan unom nga residente han ira bungto an na-alakbatan han virus. Tulo ha ira in taga Brgy Casapa, duha an taga Brgy Jia-an, ug usa an taga Brgy Matulungin. Ngatanan hira in tikang ha Manila ngan waray iginpapakita nga sintomas han virus. Lima ha ira an kalalakin-an ngan usa an babaye nga nag-eedad hin 65 anyos. An usa nga lalaki in 75-anyos na. Iginsumat han LGU nga aadto hira yana ha Isolation Center.
Tulo naman an nahidugang nga kaso ha Motiong, Samar, ug tanan hira LSI ngan mag-upay an panlawas tobtob yana ngan aadto ha Camp 1, an Isolation Facility han LGU. An duha ha ira in magbugto nga 19-anyos nga babaye ngan 4-anyos nga lalaki. Hira in mga anak han babaye nga naha-una nga nagpositibo hanhadi. Hira in tikang ha Binangonan, Rizal. An ikatulo naman in 29 anyos nga lalaki tikang ha Negros Oriental nga umagi ha Cebu antis sumakay han barko tipakadto ha Ormoc.
Usa naman an bag-o nga natapnan ha Calbiga nga umabot ha ira bungto tikang ha Caloocan City hadton Hulyo 18. Nakatagamtam ini nga 13 anyos nga lalaki han Balik-Probinsya Program han Samar. Hiya an ikatulo nga Positive Case ha Calbiga kun diin usa na an naka-recover.
Usa gihapon nga LSI an bag-o nga pasyente ha Paranas, Samar; samtang an Catbalogan City in waray maghatag hin detalye han ira bag-o nga natapnan.
Ha syahan nga higayon, nahipatik nga may nagpositibo ha Liloan, Southern Leyte. Duha hira nga pasyente kun diin usa an OFW ug an usa naman in pag-gradwar pala nga estudyante tikang ha Manila nga umuli ngadto han bungto.
Ha Pintuyan, Southern Leyte, an bag-o nga kaso in tikang ha Pandacan, Manila nga umabot hadton Hulyo 11 sakay hin ginpakyaw nga van. Nagdudumara yana hin contact tracing ngan monitoring han iya iginkasakay dida han van. Ha San Francisco, Southern Leyte, usa gihapon nga LSI tikang ha Quezon City an nagpositibo. Hiya in 48-anyos nga lalaki nga sumakay hin pribado nga behikulo.
Mayda upat nga bag-o nga nagpositibo ha Kananga, Leyte, pero tobtob han ginsusurat ini nga notisya, waray pa iginhatag nga detalye an LGU.
Ha kabug-usan umabot na 695 an nagpositibo han virus ha Eastern Visayas ngan 643 na an naka-recover (92%). Mayda naman 49 nga Active Cases hapagkayana. #
