Isumat.com/4:40AM,JUly 8, 2020
Mga Locally Stranded Individuals (LSI) ngan usa nga OFW an bag-o nga napulo nga kaso han COVID-19 ha Eastern Visayas. Ini in subay han mga impormasyon nga iginpadayag han tagsatagsa nga LGUs kun diin nag-uukoy an nasabi nga mga pasyente.
Ha bungto han Carigara, duha nga LSI ngan usa nga OFW an bag-o nga kaso. An mga LSI in babaye tikang ha Quezon City ngan lalaki tikang ha Antipolo, samtang an OFW naman in tikang ha Kuwait.
An duha nga bag-o nga nagpositibo han virus ha Barugo in mga LSI gihapon tikang ha Zamboanga ngan Cavite. Hira in mga residente han Brgy Poblacion II ngan Brgy Balire.
An didto naman ha Maasin City in duha nga kalalakin-an nga nakabalik ngadto han syudad tikang han ira ka-stranded ha Cebu.
Usa liwat nga kaso an nahidugang ha Cabucgayan, Biliran ug hiya in LSI gihapon. Ha Gandara, Samar, tikang naman ha Manila an residente nga natapnan han virus. An LGU-Bato, Leyte in nagsumat nga LSI tikang ha Cebu an bag-o nga natapnan han virus ha ira lugar.
Sumala han report han DOH Regional Office, 600 na katawo an natapnan han kagaw ha Sinirangan Bisayas. Iginpahayag liwat han ahensya nga 486 na an naka-recover. Hapagkayana 111 an active cases ngan nagpapabilin nga tulo ka tawo an namatay dara han virus. #
