Isumat.com/7:20AM, July 28, 2020
15 an bag-o nga natapnan han COVID-19 ha Eastern Visayas ngan usa ha ira in health worker, sumala han gibabag-uhi nga report han DOH Regional Office kakulop (Hulyo 27, 2020).
Subay han pahayag han LGU-Calbayog City, an health worker in residente han syudad. Hiya in 48-anyos nga babaye. Waray igsumat han LGU kun hain nga hospital o health center nagtatrabaho an nasabi nga pasyente. Labot la han health worker, mayda bag-o nga upat nga kaso ha Calbayog ug hira in mga Locally Stranded Individuals tikang ha Tondo, Pasay, Laguna ngan Marikina. Dida han 24 nga nagpositibo dida han syudad, 15 na an naka-recover ngan 9 an active cases.
Ha Probinsya han Leyte, ngatanan mga LSI an bag-o nga nagkatatapnan han virus. An mga bungto nga nagkaada hin bag-o nga Positive Cases amo an Kananga, Villaba, Merida, Capoocan, Hindang, Carigara, Barugo ngan Inopacan. Tikang ha Cebu, Mandaue, Quezon City, ngan Manila an nasabi nga mga LSI.
An Tacloban City in may bag-o nga natapnan pinaagi hin 60-anyos nga lalaki tikang ha Batangas.
Hapagkayana, umabot na ha 822 an nagin COVID Positive ha Sinirangan Bisayas ngan 650 (79%) an naka-recover. An Active Cases in aada ha 169 ngan nagpapabilin nga tulo an namatay. Waray nahipatik nga naka-recover nga pasyente kakulop.
Dida han mga natapnan, 584 (71%) an mga Locally Stranded Individuals.#
