Isumat.com/4:11AM, Septembre 03, 2020
Nagpapadayon an paglobo han ihap han mga Covid-19 Positive ha Eastern Visayas kataliwan la nga mahipatik kakulop, Setyembre 2, an 93 katawo nga bag-o nagkatatapnan han virus.
Tungod hini, umabot na 3,160 an kabug-usan nga nagpositibo dida han rehiyon. Hapagkayana, 1,215 an Active Cases ngan 25 na nga pasyente han Covid an namatay. An mga Health Personnel nga nagkatatapnan in lapos na 300.
Dida han report han DOH Regional Office kakulop, an Tacloban City an may gidadamu-i nga bag-o nga kaso. Haros 500 na an nagkatatapnan nga Taclobanon tungod han nahidugang nga 18 nga kaso. Kasagaran han mga nagkatatapnan in ginkokomponer hin mga apiki nga iginka-urusa hin mga nagpositibo han kagaw sugad man mga Health Workers ha magkalainlain nga hospital ngan dialysis centers. An DOH in nagpahayag nga Local Transmission la gihapon an natatabo ha Tacloban kay natutudlok pa man kun hin-o an nakatapon han bag-o nga mga nagpopositibo.
Nadugangan hin 14 nga pasyente an syudad han Catbalogan ngan hira in mga close contacts gihapon han naha-una nga nagkatatapnan. Sobra na hin 400 an nadarahigan han kagaw didto hini nga syudad nga aada yana ha ilarum han Enhanced Community Quarantine tungod han Community Transmission han kagaw.
10 nga positibo an nahidugang ha Alangalang, Leyte kun diiin an walo ha ira in tanan mga taga Brgy Vicente ngan close contacts gihapon. An ikasiyam in usa nga Health Worker ha Schistosomiasis Hospital ha Palo, ug an ikanapulo usa nga sundalo nga nakadestino ha Catbalogan.
An iba nga mga bungto han Leyte nga mayda bag-o nga kaso: Palo-4, Bato-4, Tabontabon-3, Abuyog-2, Tunga-2, Burauen-2, Barugo-2, ngan tag-urusa ha Babatngon, Julita, Hindang, Sta Fe ngan Tanauan.
Ha probinsya han Samar, 6 nga close contacts an nahidugang ha Pinabacdao, 4 naman ha Sta Margarita, 3 ha Villareal, ngan tag-urusa an Basey, Hinabangan ngan Jiabong.
An Northern Samar in mayda na 92 nga mga kaso kataliwan la nga madugangan ini kakulop hin 2 nga pasyente tikang ha San Roque ngan Mondragon. 51 na an nakatalwas ngan 41 an Active Cases didto han lalawigan.
12 nga kaso an nahirecord ha probinsya han Biliran kakulop. Pito ha ira an nagtatrabaho ha Biliran Provincial Hospital ug an iba mga close contacts ngan LSI. Ha kabug-usan 99 na an natapnan didto han probinsya, 60 an naka-recover, 38 an Active Cases ngan usa an namatay.
Usa naman nga pasyente an nahipatik ha Eastern samar ug hiya in LSI nga residente han San Policarpo. #
