Isumat.com/8:35AM,June 26, 2020
Umabot na ha 467 katawo ha Eastern Visayas an na-igo han corona virus. Kakulop (Hunyo 25) 16 nga bag-o nga Positive Cases an iginreport han DOH Regional Office. Lakip gihapon dida han report an tulo ka tawo nga namatay tungod han kagaw. Nagpapabilin nga aada ha 39 an Fully-Recovered.
Dida han gibabag-uhi nga impormasyon, an LGU-Sogod, Southern Leyte an nabunalan kakulop kay napulo nga residente an natapnan han kagaw. Duha ha ira in waray travel history, pero gintotoohan nga an nakatapon ha ira amo an nagpositibo nga taga Libagon kay pumakadto han tindahan kun diin nagtatrabaho an duha. An walo nga iba in tanan mga Locally Stranded Individual (LSI) tikang ha Cebu nga umabot ha ira lugar sobra na duha ka semana an nakalabay.
Ha Southern Leyte pa gihapon, an Libagon in may bag-o nga usa nga natapnan. Hiya in iginka-usa hin LSI tikang ha Cebu. Sobra na hin 10 ka tawo an nagpositibo dida hini nga bungto.
Ddidto naman ha probinsya han Samar, an Catbalogan City in nadugangan hin duha nga kaso, pero tobtob han ginsusurat ini nga notisya, waray pa maghatag hin detalye an LGU. Usa liwat an nahidugang ha Calbayog City pinaagi hin LSI nga tikang ha Cebu. Ha syahan nga higayon an bungto han San Jorge in mayda na kaso ug hiya in LSI tikang ha Manila.
An Kananga, Leyte mayda liwat usa nga nahidugang. Hiya in 42-anyos nga lalaki tikang ha Bohol.
Ha luyo nga bahin, iginpasabot han DOH an tulo nga pasyente nga nagkamamatay kun diin usa han mga rasones amo an COVID-19. An syahan amo an 65-anyos nga lalaki ha Kawayan, Biliran nga umuli tikang ha Manila. Hinsabutan nga mayda niya diabetes ngan hypertension.
An ikaduha amo an taga Kananga, Leyte nga 47-anyos nga lalaki nga nagbyahe tikang ha Cebu. BInawian hiya hin kinabuhi ha usa nga hospital ha Ormoc City. Pira ka adlaw antis hiya namatay, nag-antos hiya hin duro kamakuri nga pag ginhawa ngan ma-ul-ol nga dughan.
An ikatulo an 80-anyos nga babaye ha Tarangnan, Samar. Hiya in mayda gihapon iba nga sakit nga dumuroy dara han virus. Na-admit pa ngani hiya ha EVRMC tungod han kritikal nga iya kahimtang.
Ha atubangan hini nga paghitaas han natatapnan han kagaw, ginlalauman naman nga deri na magigin tigda an pagsaka han lista tungod kay tikang Hulyo 1 tobtob Hulyo 14, suspendido an pagpabalik ha Region 8 han ngatanan nga LSI tikang ha magkalainlain nga parte han Pilipinas.
Dida han mga kaso han rehiyon, sobra katunga hini amo an mga Locally Stranded Individuals. # (KEVIN SIOSANA)
