Isumat.com/7:29AM, September 15, 2020
Umabot na ha 52 nga kaapi han Philippine National Police ha Eastern Visayas an natapnan han Covid-19 subay han pahayag han PNP Regional Office kakulop, Setyembre 14, 2020.
Dida hini nga ihap, usa an naka-confine ha hospital, 45 an aadto ha mga Isolation Centers ngan lima na an naka-recover. Igindugang pa han report nga mayda pa tulo nga kapulisan nga aada ha monitoring tungod kay ginkonsiderar hira nga Probable Case.
Ha panig naman han mga personales nga nagtatambal han mga pasyente, 355 na nga Health Care Workers an nagpositibo han Covid. Ginlalakipan ini han mga nagtatrabaho ha pampubliko ngan pribado nga mga hospital, dialysis centers ngan Rural Health Units.
Nagpahayag an DOH Regional Office nga lapos na hin 300 an mga Health care Workers an nakatalwas tikang han peligro han virus.
Samtang, umabot na ha 3,826 an suma-total han natapnan nga taga Sinirangan Bisayas katapos la nga madugangan ini hin 67 nga kaso kakulop. Iginreport gihapon han DOH an 50 nga naka-recover, sanglit aada na ha 3,094 (80%) an nakatalwas. Mayda naman usa nga namatay sanglit 37 na nga Covid Patients ha rehiyon an tumalikod ha kadayunan.
An Catbalogan City an nagdara han gidadamu-i nga nagpositibo dida han report kakulop han DOH. 18 nga pasyente an nahidugang ngan hira in mga apiki nga iginka-urusa han mga naha-una nga natapnan. 531 na an natapnan nga Catbaloganon ngan lapos na hin 350 an nakarecover upod na an ira alkalde nga hi Mayor Dexter Uy.
Tigda naman nga nadugangan an mga nagpositibo ha Sogod, Southern Leyte kay 13 an bag-o nga kaso ug ngatanan ini pinaagi hin local transmission. Ini an syahan nga bungto ha Southern Leyte nga nag-antos hin damo nga natapnan nga mga close contacts. Kadam-an han mga nagkakatatapnan didto han probinsya an mga Locally Stranded Individuals.
Umabot naman ha 652 an Taclobanon nga nagpositibo han madugangan ini hin unom nga kaso kakulop. Porlomenos 350 na nga pasyente an nakatalwas tikang han Covid dida han syudad. #
