Isumat.com/6:05AM,July 23, 2020
Mayda nagtatrabaho ha hospital nga nahilakip dida han 30 nga bag-o nga nagpositibo han COVID-19 ha Sinirangan Bisayas, sumala han report han DOH Regional Office kagab-I (Hulyo 22).
Hiya in 24 anyos nga babaye nga nagtatrabaho ha Divine Word Hospital ngan taga Tolosa, Leyte. Hiya an ika-109 nga health worker nga natapnan han virus ha Region 8. Tobtob han ginsusurat ini nga notisya, waray pa magpagawas hin pahayag an DWH kun ha hospital ba natapnan an pasyente. Waray liwat impormasyon tikang ha LGU kasumpay hini nga isyu.
An bungto han Leyte, Leyte amo an nag-antos han gidadamu-i nga bag-o nga kaso tungod kay unom nga pasyente an nahidugang dida han bungto. Upod dida han natapnan in magtala-iroy nga tikang ha Malabon City. Mayda gihapon nagpositibo nga 35 anyos nga seaman tikang ha London. An iba pa nga pasyente ha Leyte, Leyte in mga Locally Stranded Individuals tikang ha Alabang, Muntinlupa; Pasig City ngan Paranaque City .
Upat nga Positive Cases an nahidugang ha Capoocan, Leyte ngan tanan hira in tikang ha Nueva Ecija. Ini nga mga LSI in ginkokomponer hin tulo kalalakin-an ngan usa nga babaye.
Nahipatik naman an syahan nga mga kaso ha Mayorga, Leyte pinaagi hin duha nga LSI tikang ha Quezon City. Ha luyo nga bahin, tikang naman ha Manila an LSI an bag-o nga kaso ha Palompon. An Jaro, Leyte in may duha nga bag-o nga kaso ug hira in mga LSI gihapon. Mayda gihapon usa nga positibo an nahidugang ha Matag-ob, Leyte.
An syudad han Calbayog in mayda tulo nga nahidugang nga kaso ngan hira in mga kalalakin-an. An usa tikang ha Mandaluyong ug an duha tikang ha Pampanga. Duha nga LSI an nagpositibo han kagaw ha Villareal; LSI gihapon an pasyente ha San Jorge nga tikang ha Caloocan; samtang an Gandara LSI gihapon tikang ha Bulacan.
Upat an bag-o nga kaso ha Northern Samar. Duha hini in taga Capul ngan hira in magtala-amay nga nakabalik tikang ha Antipolo. Ha syahan nga higayon, nahirecord an syahan nga mga kaso ha Gamay ngan Lope de Vega. An Gamaynon in tikang ha Quezon City ngan mayda sip-on, samtang an taga Lope de Vega in tikang ha Sampaloc ngan mayda ubo. Ha bug-os nga Northern Samar, 22 na an naka-recover han 29 nga nagkatatapnan.
Katapos naman hin sobra usa ka semana nga COVID-free an Tacloban, mayda usa nga nahilista nga bag-o nga kaso ug hiya in 62-anyos nga babaye.
Didto naman ha Sogod, Southern Leyte, OFW tikang ha Germany an nagpositibo han kagaw. Hiya in 45 anyos nga lalaki ug hiya nala an active case dida han bungto kay nagpakatalwas na an naha-una nga nagkatatapnan.
725 na katawo an nagpositibo han virus ha Eastern Visayas ngan 644 an naka-recover (88%). Mayda naman 78 nga active cases hapagkayana. #
