Isumat.com/8:23AM, Enero 30, 2021
Nagtitikadamo an mga bungto ha Leyte nga na-apektaran han African Swine Flu (ASF), an kagaw nga nagigin kawsa han kasakit ngan kamatay han baboy.
Sumala han pahayag han Department of Agriculture Regional Office, nakumpirmar han ira ahensya nga umabot na ha Dulag an virus ngan mayda na namatay nga baboy tungod hini dida han munisipalidad.
Nagsering an DA nga mayda nag report ha ira nga may nagkasakit ngan namatay nga baboy ha Brgy Combis. Kumuha hira hin sample ngan ginproseso ini ha laboratoryo ngan nagpositibo ini han ASF. Kasumpay hini, an LGU-Dulag, DA ngan mga kapitan del barangay han mao nga bungto in maghihimangraw han mga pitad nga angay buhaton basi deri na magsarang pa ini.
Ugsa hini, an mga bungto han Abuyog, La Paz ngan Javier in nadarahigan na gihapon han ASF. Igindederi na an pagpagawas ngan pagpasulod hin baboy ngadto hini nga mga lugar.
Sobra na hin 1,600 nga kababuyan an boluntaryo nga pinnamatay ngan iginlubong basi deri na magtikadamo an matapnan.
Nagpatapod naman an DA ug an mga LGU nga babaydan an mga tag-iya han baboy nga apektado han sakit.
Kadam-an na nga mga LGU ha Eastern Visayas in nagmando nga deri pasudlon an baboy o karne hin baboy tikang hini nga mga bungto sugad man tikang ha Mindanao tungod han pagkabaraka nga makasulod ha ira lokalidad an nasabi nga virus. #
