Isumat.com/9:00AM,July 23, 2020
Ginbubuhat han Divine Word Hospital ha Tacloban an ngatanan basi maseguro nga waray na iba nga matatapnan han ira empleyado nga nagpositibo han COVID-19.
Hi Dr. Avito Salinas, Medical Director han DWH, in nagsumat nga an ira nursing attendant nga nagpositibo kakulop (Hulyo 22) in aadto na yana ha Isolation Unit han hospital ngan ginmomonitor gihapon an iya mga iginka-urusa nga personales.
Gintotohan nga ini nga nursing attendant in natapnan hin usa nga pasyente han hospital. Nagsering hi Salinas nga mayda pasyente nga igin-schedule hin operasyon. Dida han syahan nga swab test ha iya, negatibo an resulta. Paghagos hin pira ka adlaw, han magkaka-ada na unta hin operasyon, gin-utro an swab test tungod kay may ubo an pasyente, ngan nagpositibo an resulta.
Ini nga nursing attendant in usa han mga nagtitimangno han pasyente samtang ginhuhulat an operasyon. An iba nga mga doktor ngan nurses nga iginkahibalag han pasyente in gin-swab test ngan negatibo an resulta. An 24-anyos la nga nursing attendant an nagpositibo.
Nagsumat pa hi Salinas nga an pasyente in nagdesisyon nga mabalhin hiya ha EVRMC ngan didto nala hiya magpapa-opera.
Hapagkayana, an nursing attendant in maupay an panlawas ngan waray iginpapakita nga sintomas han virus. Waray gihapon hiya umuli ngadto ha Tolosa, Leyte tikang han igkahibalag hiya han pasyente nga nakatapon ha iya han kagaw.
Nagpahayag hi Salinas nga bisan duro ka hingpit an paghirot han mga personales ha hospital, may mga panahon nga nakakalusot an kagaw, sugad han nahitabo yana. Iya ginklaro nga hul-os gud hira nga naghihirot kay kun nahadlok an publiko hini nga kagaw, mas nahadlok hira nga mga nagtatrabaho ha hospital kay hira an iginkaka-urusa han mga nagdadara hin sakit ngan kagaw. #
