Isumat.com/7:40AM,July 9, 2020
Iginpasamwak han DOH Regional Office kagab-i (Hulyo 8) nga may nahidugang nga 11 nga pasyente han COVID-19 ha Sinirangan Bisayas. Dida han bag-o nga mga kaso, lima an mga residente han Lavezares, Northern Samar.
An upat ha ira in mga Locally Stranded Individuals (LSI) nga tikang ha Valenzuela City ngan Tanza, Cavite nga umabot ha Lavezares hadton Hunyo 13. An ika-lima naman in residente han bungto nga waray magbiyahe tikang o ngadto hin bisan ano nga lugar gawas han Northern Samar.
Amo ini yana an hingpit nga iimbestigaron ngan magdudumara hin makuti nga contact tracing an mga health authorities basi matudlok kun diin o hin-o an nakatapon han virus hini nga pasyente. Hapagkayana, ini nga tawo in nagpapakita hin sintomas han virus.
Usa nga anggulo nga ginkikita-kita han mga Health personnel an pakig-upod hini nga lalaki han iya umangkon nga drayber hin truck. Ini nga drayber in pumasyada ha balay han pasyente. Mayda gihapon sugad hini nga panhitabo ha iba nga bungto. May tag-usa nga kaso an Hilongos ngan Burauen nga waray gud katudlok kun hin-o an nakatapon ha ira pero yana naka-recover na hira tikang han virus.
Samtang, didto naman ha Southern Leyte, tulo nga kaso an nahidugang ha Padre Burgos ngan tobtob ginsusurat ini nga notisya, waray pa impormasyon tikang ha LGU-Padre Burgos tungod hini nga mga pasyente. Usa naman nga OFW an bag-o nga nagpositibo ha munisipalidad han Sogod.
Ha Capoocan, Leyte, 32-anyos nga lalaki tikang ha Caloocan City an bag-o nga pasyente, samtang 42-anyos nga babaye tikang ha Cebu an nahidugang nga COVID Patient ha Albuera, Leyte.
Ha bug-os nga rehiyon, 611 na an nagpositibo han kagaw ngan 493 na an nakatalwas tikang han infection.
Igindeklarar naman han DOH nga COVID-Free hapagkayana an Tacloban City kay naka-recover na an mga natapnan nga residente han syudad.
An DOH in nagpasabot gihapon nga waray na natatabo nga Local Transmission han virus ha Tarangnan, Samar; sugad man ha La Paz, Burauen ngan Hilongos, Leyte. #
