Isumat.com/7:25AM,July 27, 2020
Naghihimo na yana hin mahugot nga contact tracing an mga otoridad han panlawas ha mga bungto han Carigara ngan Javier basi matudlok an posible iginka-urusa han mga nag positibo han COVID-19 ha ira lugar. Ini nga pitad in agud kabalabgan nga magsarang an kagaw labi na nga waray travel history an mga natapnan. Ginkakabarak-an nga bangin may natabo nga local transmission didto han mga lugar han duha nga pasyente.
Iginsumat han LGU-Carigara nga 17 anyos nga babaye an pasyente ngan deri hiya Locally Stranded Individual ngan deri liwat OFW. Lima nga pamilya an ginsagdunan han LGU nga mag-kwarentina. Ini an mga kabugtu-an ngan mga paryente han natapnan. Hira in nag-uukoy ha Brgy Ponong, Brgy Pangna, Brgy Baruguhay Norte, Brgy Baruguhay Central ngan Brgy Sawang.
An pasyente in naka-confine yana ha Carigara District Hospital. An mga close contact hini nga babaye in kukuhaan yana hin swab samples basi makumpirmar kun natapnan hira.
Samtang, naka-confine naman ha Municipal Isolation Unit an 24-anyos nga babaye didto ha Javier. Hiya in taga Brgy Rizal ngan waray gihapon travel history sanglit dako nga paki-ana kun diin o hin-o an nakatapon ha iya. Nagpositibo hiya han virus han magpa-admit hiya ha Divine Word Hospital.
Ginhihimo yana an contact tracing han LGU samtang nagpapabilin naman nga maupay an panlawas ngan waray iginpapakita nga sintomas han sakit an pasyente.
Ini nga nagpositibo ha Javier amo an nag-uusaan nga natapnan han virus nga iginreport kakulop (Hulyo 26) han DOH. An taga Carigara in lakip dida han 46 nga natapnan nga iginreport hadton Hulyo 25.
Hapagkayana, umabot na ha 807 an natapnan ha Eastern Visayas ngan 650 an naka-recover (80%). Aada naman ha 154 an active cases ngan nagpapabilin nga tulo nga pasyente an namatay tungod han virus. # (KEVIN SIOSANA)
