Isumat.com/8:57AM, July 29, 2020
Ginkumpirmar ni Tacloban City Health Officer Gloria Fabrigas nga may natatabo nga local transmission han corona virus dida han syudad. Ini in dara han tulo nga Taclobanon nga nagpositibo han virus bisan waray travel history ha iba nga lugar.
Dida han pamaki-ana han 99.1 iFM-RMN, hi Fabrigas in nagpahayag nga klaro gud ini nga local transmission kay waray man gumawas han Tacloban an nasabi nga mga pasyente, karuyagsidngon mayda tawo nga aanhi o pumakanhi ha Tacloban nga nakatapon ha ira.
Deri ini urusahon kun may local transmission kay waray man igsara han Tacloban an mga borders ngan gintutugutan man an bisan hin-o nga makasulod han syudad, sanglit posible nga mayda positibo han kagaw nga nakasulod han syudad ngan nakatapon, pahayag pa ni Fabrigas.
Igiindugang pa ni Fabrigas nga bisan hin-o nga tawo an posible nagdadara han kagaw, sanglit kinahanglan gud nga magin ikmat an publiko ngan tim-os nga pagsundon an health protocol sugad han pagsul-ot han face mask ngan physical distancing.
An health official in nagpabati gihapon nga posible “false positive” an natabo.
Samtang iginsumat naman ni Fabrigas nga tikang han Mayo tobtob Hulyo, umabot na ha 1845 an mga Locally Stranded individuals an nakabalik ha Tacloban. Dida hini nga ihap, 1174 an nakatapos na han kwarentina ngan naka-uli na ha tagsatagsa nga balay ngan sobra 300 an ginmomonitor.
Nagtudlok gihapon an City Health Office hin mga personales ha barangay nga tinatawag nga Volunteer Surveillance Officers nga mabulig han contact tracing.
Ginpasalamatan liwat han opisyal an mga lider han barangay tungod han ira pagreport kun may mga LSI nga nakakalusot pagbalik ha Tacloban, sanglit kadagmitan hira nga namomonitor han City Health Office. #
