Isumat.com/2:40PM, July 27, 2020
Nahilambing an usa nga pribado nga hospital dida han kontrobersiya ha Philhealth kun diin usa nga hitaas nga opisyal han ahensya an posible nagpapaluyo kun kay-ano nabahinan an nasabi nga hospital hin minilyon-milyon ka pesos tikang han Interim Reimbursement Mechanism (IRM).
Dida han artikulo ha Philippine Daily Inquirer, nagmamalatumat nga an mga resident auditors han Philhealth in nagtudlok kan Senior Vice-President Renato Limsiaco nga posible may kalabutan dida han paghatag hin 9.6 Milyones pesos ngadto ha Catarman Doctors Hospital hadton Abril 15.
Nagsering an mga auditors nga ini nga salapi in kaparte han 30 Bilyones Pesos nga “financial package” han Philhealth para han mga hospital nga nagtitimangno han mga pasyente han COVID. Nagpahayag pa an report nga deri angay makatagamtam ini nga hospital hini nga kabaraydan kay waray ini akreditasyon ha Philhealth.
Sering pa han auditors, waray akreditasyon an Catarman Doctors Hospital, pero usa ini han mga hospital nga syahan natagan han pondo. Nahisumat pa nga an nasabi nga hospital in may gin-aatubang nga kaso administratibo dara hin pakatalapas han mga patakaran han Philhealth han nag-agi nga panahon.
Sugadsugad nga paborito ni Limsiaco ini nga hospital han hiya pa an Regional Vice President han Philhealth-Region 8, pahayag pa han state auditors.
Sumala pa han artikulo han Inquirer, nahipapa-usa an mga auditors kun kay-ano nga lumakat ha Central Office hi Limsiaco antis an lockdown ngan pumakadto ha Region 8. Nagpapaki-ana an mga auditors kun nanginginano ba hi Limsiaco han pagpanalapi han nasabi nga hospital.
Hi Senador Ping Lacson in nagtudlok gihapon han Limsiaco nga nagpapaluyo han gibabag-uhi nga eskandalo ha Philhealth. Magpapasa hin resolusyon hi Lacson basi imbestigaron han senado ini nga isyu.
Pira pala ka adlaw an nakalabay, ginbay-og an Philhealth hin akusasyon hin pira nga opisyal han ahensya mahitungod han natatabo daw nga haluag nga anomaliya dida han buhatan. #
