Isumat.com/8:49AM,July 01,2020
Mayda mga pagbag-o nga matatabo ha pagpatuman han General Community Quarantine (GCQ) ha probinsya han Leyte. Ini an iginpahayag ni Col Rodelio Samson, hepe han Leyte PNP Provincial Office.
Sumala kan Samson, tungod kay iginbalik an Leyte tikang ha MGCQ ngadto ha GCQ, mas magigin istrikto liwat an kapulisan ha pagmonitor ngan pagbantay han seguridad han probinsya labi na gud para han mga magkakasulod tikang ha iba nga lugar.
Partikular nga gintudlok han opisyal an mga pantalan ha Leyte kun diin damo nga mga indibiduwal nga sakay hin mga cargo ships an nagmamalalusot pag-uli bisan waray kaangayan nga dukumento. Igindig-on ni Samson nga deri pahahaw-ason ha barko ini nga mga “Ninja.” Amo gihapon ini an ira bubuhaton ha mga trak nga nagdadara hin produkto tikang ha gawas han rehiyon.
Tungod gihapon nga iginbalik an Leyte ha GCQ, istrikto nga babantayan an mga tawo nga magawas han balay. Nagwarning hi Samson nga ha ilarum han GCQ, deri puede gumawas ha balay kun deri importante an tuyo nga kakadtu-on o papaliton.
Iginsumat pa ni Samson nga an mga Mayors han mga bungto an magbobo-ot kun karuyag ba nira nga igbalik an mga checkpoints ha ira tagsatagsa nga bungto.
Iginpatapod naman han Leyte PNP nga naghihirot an ira mga tauhan hin tim-os basi deri katapnan han corona virus. # (KEVIN SIOSANA)
