Isumat.com/7:00AM, June 14, 2020
Basi matagan han kaangayan nga pagtimangno, nagdesisyon an Municipal Inter-Agency Task Force han Libagon nga igbalhin ha Salvacion Oppus Yniquez Memorial Provincial Hospital (SOYMPH) ha Maasin City an tulo ka tawo ha ira bungto nga nagpositibo han COVID-19.
Ini nga mga pasyente in nahilakip dida han 68 nga bag-o nga Positive Cases ha Eastern Visayas nga igin-anunsyo kagab-i han Department of Health.
Nagsering hi Mayor Sabina Ranque nga waray igka-urusa ha ira pamilya ini nga mga pasyente kay tikang han ira pag-abot deretso na hira gin-akomodar ha Quarantine Facility han bungto. Gindudumara yana han LGU an contact tracing han mga personales han munsipyo nga iginkahibalag han tulo ka tawo han pagkuha ha ira tikang ha pantalan han Maasin City ngan Tacloban Airport.
An mga nagpositibo ha Libagon in duha nga OFW nga nagtatrabaho hin luxury vessel nga an destinasyon ha Dubai ngan Florida. Hira in umabot ha Tacloban Airport ngan iginderetso ha kwarentina. Tobtob yana, waray hira iginpapakita nga siintomas han virus.
An ikatulo amo in usa nga na-stranded nga umuli tikang ha Talisay City, Cebu sakay hin barko nga dumo-ong ha Maasin City Port. Ini nga Locally Stranded Individual in mayda na sip-on ngan ubo han iya pag-abot. Nagdesisyon an LGU-IATF nga igpa-admit hira nga tulo ha SOYMPH.
Nanawagan hi Ranque ha iya nasasakupan nga pirmi sundon an mga patakaran kasumpay han paghirot kontra han virus ngan deri gumagad hin deri beripikado nga mga impormasyon.
An Libagon in ginkokomponer hin 14 nga barangay. Labot la hini nga munsipalidad, an mga bungto ha Southern Leyte nga nagka-ada na hin positibo nga mga kaso han corona virus amo an Bontoc, Padre Burgos, ngan Macrohon. # (KEVIN SIOSANA)
